«Միջազգային հանրության կարծիքը հստակ է և օրեցօր զորեղանում է: Այդ պատճառով էլ ՄԻԵԴ-ի կիրառված միջազգային միջոցը մնաց անփոփոխ»,- «Արմենպրես»-ի մամուլի սրահում հրավիրված ասուլիսում հայտարարեց Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանը:
Նա տեղեկացրեց՝ երեկ դիմել են Մարդու իրավունքների եվրոպական դատարանին (ՄԻԵԴ)՝ հաշվի առնելով վերջին շաբաթների զարգացումները, տարբեր տեսանյութերի հետազոտությունը: Նա մանրամասնեց. «Տեսանյութերում երևում են ռազմագերիների կամայական գնդակահարություններ, դիակների նկատմամբ վատ վերաբերմունք, այլանդակություններ, գլխատում, որոնք սարսափելի են և ինքնին անխոս թե՛ մարդասիրական իրավունքի, թե՛ մարդու իրավունքների տեսանկյունից անընդունելի են: Դիմել ենք ՄԻԵԴ-ին կիրառված միջանկյալ միջոցի շրջանակները ընդլայնելու խնդրանքով, որ ոչ միայն քաղաքացիական բնակչությանը և քաղաքացիական բնակավայրերի թիրախավորմանը վերաբերվի միջանկյալ միջոցը, այլ ադրբեջանական իշխանությունների վերահսկողության ներքո հայտնված ցանկացած անձի՝ թե՛ ռազմագերու, թե՛ քաղաքացիական բնակչի անվտանգության ապահովման նկատառումները: Ակնկալում ենք առաջիկա օրերին պատասխանը ՄԻԵԴ-ի կողմից»:
Եղիշե Կիրակոսյանի խոսքով՝ կիրառված միջանկյալ միջոցների ամբողջական կյանքի կոչելը, հասկանում ենք, բարդ է այս գործընթացում՝ հատկապես, որ լիաթոք պատերազմական գործողություններ են ընթանում, բայց այն էական է հիմա և հետագայում էլ: Այս առիթով նա պարզաբանեց. «Ամեն դեպքում կարծում եմ Կոնվենցիայով նախատեսված մեխանիզմները, որոնք ներառում են նաև Նախարարների կոմիտեի միջամտություն այս հարցերին, երբ միջանկյալ միջոցները չեն պահպանվում, կլինի շուտով: Արդեն Նախարարների կոմիտեում մեկ անգամ քննարկում եղել է: Կարևոր է, որ հետևողականորեն այս հարցերը լինեն քննարկման առարկա»:
Կարդացեք նաև
Տաթև ՀԱՐՈՒԹՅՈՒՆՅԱՆ
