Կիրակի լույս երկուշաբթի գիշերը սյունեցիներին կոչով դիմել է Սյունիքի մարզպետ Հունան Պողոսյանը․ «Հարգելի՛ սյունեցիներ, այս օրերին բազմաթիվ սյունեցիներ իրենց պարտքն են կատարում՝ ծառայելով հայրենիքին, պաշտպանելով մեր հայրենիքը։ Ահռելի աշխատանք է կատարվում նաեւ թիկունքում՝ միավորելով խաղաղ բնակչության բոլոր ուժերն ու հնարավորությունները։
Պայքարը շարունակվում է, ու մեր համայնքների բնակիչներն ու սյունեցի քաջերը՝ ժամկետային զինծառայողներ, պահեստազորայիններ, կամավորականներ, երկրապահներ, անում են հնարավորն ու անհնարինը՝ հանուն վերջնական ու կայուն հաղթանակի, հանուն մեր սահմանների անառիկության։
Սիրելի՛ սյունեցիներ, խնդրում եմ՝ առանց խուճապի մատնվելու, հաստատուն ու ամուր մնացեք ձեր բնակավայրերում ու հետեւեք համայնքների ղեկավարների ցուցումներին, յուրաքանչյուրդ ձեր տեղում շարունակեք ծառայել հայրենիքին ինչով եւ ինչպես կարող եք, օգնելով թե՛ ճակատին, թե՛ ամրացնելով թիկունքը։
Կոչ եմ անում մասնակցել ինքնապաշտպանությանը, կամավորագրվել ու ծառայել հայրենիքին՝ հանուն մեր երկրի եւ մեր զավակների ապագայի»,–ասված է մարզպետի կոչում։
Կարդացեք նաև
Հիշեցնենք, որ մինչ այս կոչը Քաջարանի քաղաքապետ Մանվել Փարամազյանը եւ Մեղրիի քաղաքապետ Մխիթար Զաքարյանը ֆեյսբուքի իրենց էջով դիմելով իրենց համաքաղաքացիներին՝ կոչ էին արել 20-60 տարեկանները կամավորագրվեն Սյունիքը փրկելու համար։ Սա խուճապ էր առաջացրել սոցցացնցերում, մարդիկ անհանգստացել էին, նույնիսկ ոմանք տեսակետ էին հայտնել, որ ընտանիքներով ժամանակավոր բնակության են մեկնելու Երեւան։
Մինչեւ մարզպետի կոչը, ՀՀ պաշտպանության նախարարության ներկայացուցիչ Արծրուն Հովհաննիսյանը, անդրադառնալով Մեղրիի եւ Քաջարանի քաղաքապետերի հայտարարություններին, նշել էր, որ խուճապի կարիք չկա, պարզապես դրանք միտված են տարածաշրջանի անվտանգության ապահովմանը։
