Ստեղծված պատերազմական իրավիճակում մեծ առաքելություն են իրականացնում Արցախի Հանրապետության արտակարգ իրավիճակների պետական ծառայության ծառայողները: Զրուցել եմ ԱՀ ԱԻՊԾ տեղեկատվության եւ հասարակայնության հետ կապերի բաժնի սպա, լեյտենանտ Հունան Թադեւոսյանի հետ։
– Կխնդրեմ մի փոքր նկարագրեք փրկարարների աշխատանքը մինչեւ պատերազմն ու պատերազմի ժամանակ:
– Սովորական օրերին Արցախի արտակարգ իրավիճակների ծառայությունն աշխատում էր արտակարգ ռեժիմով: Այս օրերին՝ ավելի ուժեղացված: Առանց վարանելու եւ խուճապի մատնվելու՝ ծառայության տնօրեն, գնդապետ Կարեն Սարգսյանը կոնկրետ հրամաններ ու հանձնարարություններ է տվել փրկարարական ջոկատներին եւ հենց առաջին օրից կազմակերպված սկսվել է փրկարարի առաքելությունը: Ստեփանակերտը խլացնում էր տագնապի ազդանշանն ու այստեղ տարածվել էր վառոդի հոտը:
– Ինչպես գիտենք, Ստեփանակերտում հիմնականում քաղաքացիական օբյեկտներն են թիրախավորվում:
Կարդացեք նաև
– Այո, մայրաքաղաքում թիրախավորվում են հիմնականում քաղաքացիական օբյեկտներն ու ենթակառուցվածքները: Բազմաթիվ փլատակված շենք-շինություններ, վիրավորներ ու զոհեր էլ կային: Ուզում եմ անպայման նշել, որ հերոսական աշխատանք են կատարել փրկարարները: Անգամ կրակոցների տակ նրանք սնունդ ու անհրաժեշտ պարեն, դեղորայք ու այլ պարագաներ են մատակարարում ապաստարաններ: Հրշեջ փրկարարական խմբերը հազիվ էին հասցնում մեկուսացնել հրթիռներից այրվող բնակարանները: ՃԿԿ-ում գրանցվում էին նոր կանչեր: Արագ արձագանքման ստորաբաժանումները փլատակներից հանում եւ բուժհաստատություններ էին տեղափոխում վիրավորներին, շատ դեպքում ցուցաբերելով առաջին օգնություն:
– Ի՞նչ կորուստներ եղան, երբ ռմբակոծվեց ԱԻ ծառայության շենքը:
– Հոկտեմբերի 2-ին մասամբ ռմբակոծվեց ԱԻ ծառայության շենքը: Ցավոք, մեկ զոհ ու վիրավորներ ունեցանք: Դա չխանգարեց մեր աշխատանքին: Կարեն Սարգսյանը վերամոբիլիզացրեց ուժերը, բաշխվեցինք թիմերի եւ շարունակեցինք ծառայությունը: Պատերազմն ավարտվի, ավերվածը կկառուցվի: Միշտ այսպես է ասում տնօրենը:
– Ի՞նչ նոր մարտահրավերներ կան:
– Հիմա Արցախի փրկարարները կանգնած են նոր մարտահրավերի առաջ. քաղաքում եւ շրջաններում հայտնվել են թշնամու արձակած, դեռեւս չպայթած հարվածային, հրթիռային եւ կասետային ռումբեր: Սակրավորական խմբերն այժմ զենք-զինամթերքի հայտնաբերման ու դրանց ոչնչացման ուղղությամբ են աշխատում:
Արցախի փրկարարներին հումանիտար աջակցություն բերեց ՀՀ արտակարգ իրավիճակների նախարարությունը: Պատերազմի հաջորդ օրը նախարար Ֆելիքս Ցոլակյանն էր Արցախում: Հետո եկան փրկարար ջոկատները, ովքեր արցախցիների հետ կողք կողքի անցնում են պատերազմական այս ծանր ու դժվար փորձությունը: Ուշադրությունը միշտ կարեւոր գործոն ու երեւույթ է եղել մեզանում:
– Տագնապի ազդանշանն ավարտվելուց հետո կյանքն ինչպե՞ս է ընթանում մայրաքաղաքում:
– Երբ կտրվում է տագնապի ազդանշանի ձայնը՝ միանգամից կարելի է տեսնել քաղաքի ծաղիկները ջրող, խնամող տղամարդկանց, փողոցները օրվա փոշուց մաքրող կանանց ու նրանց օգնող երիտասարդների: Մեր բոլորի ցանկությունն է, որ օր առաջ ավարտվի պատերազմը եւ ունենանք արժանապատիվ խաղաղություն: Մենք թանկ կյանքեր դրեցինք այս պատերազմի զոհասեղանին:
Զրույցը՝ ՎՈՎԱ ԱՐԶՈՒՄԱՆՅԱՆԻ
Արցախ
«Առավոտ» օրաթերթ
17.10.2020
