Կոտայքի մարզի Եղվարդ քաղաքում գործող «Էկո-Ֆարմ» ընկերությունը, որը զբաղվում է ջայլամաբուծությամբ եւ ջայլամի յուղով խնամքի պարագաների արտադրությամբ, արցախյան գոյամարտի առաջին օրերից կանգնել է հայ զինվորի կողքին։
Ընկերությունը, կարելի է ասել, ընտանեկան է, ընտանիքի բոլոր անդամներով են աշխատում։ Վաճառված յուրաքանչյուր խնամքի մեկ միջոցի դիմաց՝ մեկ օճառ հատկացվում է բանակին։
«Օճառները բնական են, ունեն հակաբորբոքային ազդեցություն, որն այս օրերին շատ է պետք առաջնագծի մեր զինվորներին»,–ասաց ընկերության խնամքի պարագաների արտադրության գծով տնօրեն Լիլիթ Ղարիբյանը։ Վերջինիս խոսքով, ջայլամի յուղով պատրաստված օճառները օգնում են լուծելու մաշկի հետ կապված շատ խնդիրներ ՝ բորբոքումներ, գրգռվածություն, ճաքճքվածություն, պիգմենտացիա, այրվածքներ, ռոզացեա, էկզեմա։
Կարդացեք նաև
Արտադրության համար ունեն համապատասխան լիցենզիա։ Համեմատության համար նշենք, որ այսպիսի բուժիչ օճառի մեկ հատի գինը 2000 դրամ է։
Ընկերությունը պատրաստվում է առաջիկա օրերը նոր խմբաքանակ ուղարկել բանակ։ Օճառների հետ զինվորներին նաեւ ալկոգել ու ջայլամի յուղ են ուղարկում։ Aravot.am-ի այն հարցին, թե ինչպես են կազմակերպում ուղարկելը, Լիլիթ Ղարիբյանը նշեց, որ Եղվարդում կան բանակին ուղարկվող օգնությունը համակարգողներ եւ աշխատում են նրանց հետ։
«Մեր բոլորիս արածը շատ չնչին է հայոց սահմանները իրենց կյանքի գնով պաշտպանող զինվորների արածի դիմաց։ Պարզապես ուզում ենք, որ հայ քաջերը առողջ լինեն, չհիվանդանան։ Շուտով հաղթելու ենք»,–ասաց Լիլիթ Ղարիբյանը։
Արմեն ԴԱՎԹՅԱՆ
