«Մենք, ընդհանուր առմամբ, դրական ենք գնահատում միջազգային հանրության ջանքերը, առաջին հերթին՝ եղբայրական Ռուսաստանի ջանքերն ուղղված հրադադարի վերականգնմանը եւ պատերազմի դադարեցմանը»,-լրագրողների հետ ճեպազրույցում այսօր անդրադառնալով այն փաստին, որ երկրորդ անգամ ձեռքբերված հումանիտար հրադադարի մասին համաձայնությունն Ադրբեջանը խախտում է կոպտորեն՝ ասաց Արցախի հանրապետության նախագահի խորհրդական Դավիթ Բաբայանը:
«Կարծում եմ, որ եթե այս անգամ էլ հակառակորդը չհարգի միջազգային հանրության ջանքերը եւ հրադադարի ռեժիմը կրկին չեղյալ համարի, երրորդ անգամ շատ ավելի կոշտ եւ լրիվ այլ մեթոդներով են զինադադարը վերականգնելու ԵԱՀԿ ՄԽ համանախագահողները, որովհետեւ սա առանց այդ էլ մարտահրավեր է միջազգային հանրությանը: Երրորդ անգամ, չեմ կարծում, որ որոշ երկրներ կհանդուրժեն նման պահվածքը: Արցախը պինդ է եւ կանգուն՝ անկախ ամեն ինչից: Նման մարտահրավերը ճակատագրական է, եւ կանգնելու ենք մինչեւ վերջ: Թող որեւէ մեկը չկասկածի»,-վստահեցրեց Դավիթ Բաբայանը:
Նրա կարծիքով՝ միջազգային հանրության ջանքերը եթե ժամանակին ավելի կոշտ լինեին, գուցե չէինք ունենա այս իրավիճակը. «Որոշ կազմակերպություններ պարտավոր էին ավելի օպերատիվ եւ կոշտ արձագանք հղել, որպեսզի նման պատերազմը, որը նաեւ մարդասիրական ճգնաժամ է…գուցե այլ իրավիճակ ունենայինք: Սա ակնհայտորեն ցույց է տալիս, որ այո, մենք պետք է շարունակենք գործակցել միջազգային կառույցների հետ, բայց խաղաղության եւ մեր անվտանգության ամենակարեւոր գրավականը նաեւ եղբայրական երկրների հետ ճիշտ աշխարհաքաղաքական հարաբերությունը նոր որակի հասցնելն է: Մենք պարտավոր ենք սրանից հետո համապատասխան հետեւություններ անել բոլոր մակարդակներով»:
Դավիթ Բաբայանը հույս հայտնեց, որ այս զինադադարն, այնուամենայնիվ, իր նպատակին կհասնի. «Կրկնում եմ՝ անկախ ամեն ինչից, մենք շատ լավ ենք գիտակցում, թե ում հետ գործ ունենք, ուստի մեր զինված ուժերը շարունակելու են իրենց հերոսական եւ պատմական առաքելությունը»:
Կարդացեք նաև
Լուիզա ՍՈՒՔԻԱՍՅԱՆ
