Հոկտեմբերի 16-ին Թուրքիայում տևական հիվանդությունից հետո կյանքից հեռացել է մեջլիսի իշխող «Արդարություն և զարգացում» (ԱԶԿ-AKP) կուսակցության հայ պատգամավոր Մարգար Եսայանը։
51-ամյա նախկին լրագրող, գործող պատգամավոր Եսայանը երկարատև բուժում էր ստանում քաղցկեղի դեմ։ Հայ պատգամավորը դեռևս 2019-ի հոկտեմբերի 19-ին սոցցանցում արած գրառմամբ նշել էր իր բուժման կուրսի մասին:
Նշենք, որ հայ պատգամավորի ընտանիքին և հարազատներին ցավակցություններ են հայտնել Թուրքիայի նախագահ Ռեջեփ Թայիփ Էրդողանը, իշխող կուսակցության բազմաթիվ անդամներ, քաղաքական գործիչներ։
Մարգար Եսայանը ծնվել է 1969 թվականի փետրվարի 11-ին Ստամբուլ քաղաքում: Սովորել է Ստամբուլի Կեդրոնական վարժարանում, այնուհետև Ստամբուլի Բիլիջի համալսարանում: 1997-2008 թվականներին հոդվածներ է գրել «Ակոս» շաբաթաթերթի համար, 2008 թվականից իր առանձին սյունակն է ունեցել թուրքական «Թարաֆ» օրաթերթում: Նա որպես լրագրող աշխատել է թուրքական «Yeni Şafak» պարբերականում:
Կարդացեք նաև
2018 թվականի հունիսի 24-ին Թուրքիայի իշխող «Արդարություն և զարգացում» կուսակցության կողմից Ստամբուլի 2-րդ ընտրատարածքում պատգամավորի թեկնածու առաջադրված Մարգար Եսայանը դարձել է խորհրդարանի պատգամավոր:
