Aravot.am-ը զրուցել է Հայ առաքելական եկեղեցու Արցախի թեմի առաջնորդ, Արցախի հերոս Տ. Պարգեւ արքեպիսկոպոս Մարտիրոսյանի հետ:
-Սրբազան հայր, հոկտեմբերի 14-ին Ադրբեջանի նախագահ Իլհամ Ալիեւը France 24 հեռուստաալիքին տված հարցազրույցում կասկածի տակ առավ Շուշիի Սուրբ Ամենափրկիչ եկեղեցու հրթիռակոծության փաստը՝ ակնարկելով, որ հայերն իրենք են հարվածել իրենց եկեղեցուն: Խնդրում եմ ձեր դիտարկումները բարձրաձայնել այս հայտարարության առթիվ:
-Դա կատարյալ ցինիկ սուտ է: Երբ մարդը շատ լավ գիտի, որ դա կատարվել է իրենց իսկ հրամանով, սակայն ուզում է մեր վրա բարդել, ծիծաղելի է…Կյանքում ոչ մի հայ իր սրբավայրին չի դիպչի: Դա բացառված է:
Ավելին ասեմ՝ 90-ականներին նրանք եկել եւ ռմբակոծել են Գանձասարը. քանդվել էր մի ամբողջ միաբանական շենք: Ռումբեր էին թափում, հետո եկան 40 հրթիռ բաց թողեցին…Տանկով խփում էին Ամարասի վանքին, որի արեւելյան պատին մի քանի հարված կա, անգամ կպել էին ռոտոնդայի մեկ ոտքին՝ թնդանոթով:
Կարդացեք նաև
Էլ չասեմ, որ երբ յոթ փախստականներ չէին հասցրել հեռանալ եւ մնացել էին Գյուլիստանի եկեղեցում, բռնել մորթել էին, գլուխները գցել խորանի վրա, իսկ խորանի վերին պատի առաստաղը, գմբեթը պայթեցրել էին: Ուստի սա նույն ձեռագիրն է, որ կար եւ որը հիմա կա: Որեւէ նորություն չկա այստեղ:
Ինքն ամեն անգամ պատերազմը սկսում է ու փորձում ուրիշների վրա գցել: Մենք երբեւէ զինադադարը չենք խախտել, պատերազմ չենք սկսել: Ու մի մոռացեք, որ գողը միշտ գոռում է՝ «գողին բռնե՜ք, գողին բռնե՜ք»…այս ասացվածն իրենց է վերաբերում»:
Լուսանկարը՝ Տ. Պարգեւ արքեպիսկոպոս Մարտիրոսյանի ֆեյսբուքյան էջից
Հիշեցնենք, որ հարցազրույցում Ալիեւը նախ անուղղակի խոստովանել էր կատարվածը՝ ասելով. «Ես չեմ ասում, որ մենք դա արել ենք վրեժի համար: Ոչ: Մենք պետք է ուսումնասիրենք հարցը»: Ապա հավելել էր՝ «Մենք վստահ չենք կատարվածում: Կասկածներ կան, որ դա հայերի ձեռքի գործն է, որոնք ուզում են մեզ մեղադրել», հետո շտապել էր հիշեցնել, թե իրենց թիրախների թվում պատմական-կրոնական կառույցներ չեն կարող լինել:
Ինչպես ՀՀ ՊՆ ներկայացուցիչ Արծրուն Հովհաննիսյանն է փաստել, Շուշիի եկեղեցուն հասցվել են երկու գերճշգրիտ՝ թիրախային հարվածներ:
Հիշեցնենք, որ սեպտեմբերի 27-ից Ադրբեջանը Թուրքիայի ուղղակի ներգրավվածությամբ եւ օժանդակությամբ ռազմական լայնածավալ ագրեսիա է իրականացնում Արցախի դեմ:
Լուիզա ՍՈՒՔԻԱՍՅԱՆ
