«Մենք շատ բարձր ենք գնահատում այն ընդհանուր ընկալումն ու գնահատականը, որը ձեւավորվել է մեր գործընկերների եւ միջազգային հանրության մոտ: Այն է՝ անհնար է թաքցնել իրողությունը, որ սա իրականացված ագրեսիա է Արցախի հանդեպ, որի թիրախում է քաղաքացիական բնակչությունը»,-լրագրողների հետ ճեպազրույցում այսօր անդրադառնալով Ադրբեջանի շարունակվող ռազմական գործողություններին Արցախի դեմ՝ ասաց ՀՀ ԱԳ նախարար Զոհրաբ Մնացականյանը:
«Հիմնախնդրի լուծման համար ընտրված է ուժի կիրառման, ագրեսիայի ճանապարհը: Էական հարցն այստեղ այն է, որ Արցախի ժողովուրդն է պաշտպանում իր գոյությունն ու իրեն, իսկ Հայաստանը եղել եւ մնում է Արցախի անվտանգության երաշխավորը»,-շեշտեց նախարարը:
Նրա բնորոշմամբ՝ երկու նոր հանգամանքները՝ Թուրքիայի եւ միջազգային ահաբեկիչների գործոնները ստեղծել են ամենավտանգավոր հաշվարկը Բաքվում, թե իրենք կարող են չլսել միջազգային հանրության մոտեցումն այս հարցում. «Դա բնականաբար, վտանգավոր է, միաժամանակ՝ ունի հետեւանքներ: Հայաստանի համար հարցը եղել եւ մնում է առավել քան պարզ՝ գոյութենական անվտանգության խնդիրն է դրված. Արցախի ինքնորոշման իրավունքի ճանաչումը գերակա խնդիր է: Մենք շարունակելու ենք աշխատել միջազգային հանրության հետ՝ հավատարիմ Մոսկվայում ձեռքբերված հումանիտար հրադադարին: Ուժի միջոցով խնդիրը չի հանգուցալուծվելու: Դա ապացուցում են մեր խիզախներն Արցախում, որոնք բացառելու են թշնամու՝ խնդրի ռազմական լուծում ունենալը»:
Կարդացեք նաև
Լուիզա ՍՈՒՔԻԱՍՅԱՆ
