Սիսիանցի Գագիկ Լալայանն ու կապանցի Կարինե Օվչյանն իրենց որդիներին Դավիթ ու Հայկ կոչեցին, որ հայոց նախապապերի նման ուժեղ ու հայրենասեր լինեն։ Դավիթը անդրանիկ որդին է ու ապրիլյան քառօրյայի մասնակից։
Մոտ 5 տարի իրենից փոքր եղբորը՝ Հայկին շատ էր պատմել հայ զինվորի մարտական ոգու մասին, որից ավելի էր ոգեւորվել Հայկը։
Հադրութում էր ծառայում, սեպտեմբերի 27-ի առավոտյան ու երեկոյան է զանգել մորն ու ասել՝ չվախենաք, սա էլ կպրծնի։ «Ամսի 28-ին ոչ մի տեղեկություն, քուն ու դադար չունեինք։ Միայն հոկտեմբերի 1-ին ասացին, որ զոհվել է՝ հենց ամսի 28-ին»,–Aravօt.am-ի հետ զրույցում ասաց Հայկի մայրը՝ Կարինե Օվչյանը։
19 տարեկան էր Հայկը, 9 ամսվա ծառայող։ Դպրոցն ավարտելուց հետո աշխատել է։ Մոր խոսքով, սովորելու հետ այնքան էլ սեր չուներ, բայց աշխատասեր էր։ Համակարգչային հմտությունների էր տիրապետում։
Կարդացեք նաև
«Զոհվելուց հետո իմացանք, որ զորամասում առաջարկել էին համակարգչի վրա աշխատել, հրաժարվել էր, ասել էր՝ ես հետախույզ եմ ու միշտ առաջնագծում էր»,–հուզված, բայց հպարտությամբ պատմում է մայրը։ Մինչեւ 3-րդ դասարանը Կապանի թիվ 3 դպրոցում է սովորել, հետո ընտանիքով տեղափոխվել են ապրելու Երեւանում։
«Մարդասեր, աշխատասեր, ինչ ասեմ էլ։ Ընկերուհի ուներ, ասում էր՝ մամ, գամ բանակից, մի քիչ էլ աշխատեմ, փող դզեմ՝ ամուսնանամ՝ չհասցրեց Հայկս։ Նպատակները կիսատ մնացին»,–ասաց տիկին Կարինեն։
Արմեն ԴԱՎԹՅԱՆ
