Այսօր վաղ առավոտյան, հակառակորդը նորից հարձակողական գործողություններ է նախաձեռնել՝ 2-3 ուղղություններով. ողջ օրվա ընթացքում համառ մարտեր են ընթացել, հատկապես հարավային ուղղությամբ՝ մերձարաքսյան տարածքում: Այս մասին, քիչ առաջ, հայկական միասնական տեղեկատվական կենտրոնում կայացած մամուլի ասուլիսում հայտարարեց ՊՆ պաշտոնական ներկայացուցիչ Արծրուն Հովհաննիսյանը:
Մեր զորքերը հերոսական դիմադրություն են ցույց տվել, երկուստեք կորուստներ կան: Ըստ Արծրուն Հովհաննիսյանի, հակառակորդին պատճառվել են զգալի կորուստներ եւ հաջողվել է հակառակորդին ետ շպրտել: «Ընդհանուր առմամբ, իրավիճակը շարունակում է ծանր մնալ»,- ասաց Արծրուն Հովհաննիսյանը՝ հավելելով, որ հակառակորդը կիրառում է մեծ քանակի ուժեր, հատկապես հետեւակ, անդադար գրոհել է նաեւ օդուժի տարբեր միջոցներով: Նա նաեւ ասաց, որ գիշերային ժամերին կրակի որոշակի թուլացում է տեղի ունենում, սակայն, առավոտյան ժամերին, հակառակորդը նորից լայնածավալ գրոհներ է իրականացնում: Գրոհները, օրվա ընթացքում, տարբեր ուղղություններով թուլանում են կամ սաստկանում:
Արծրուն Հովհաննիսյանը տեղեկացրեց, որ Քաշաթաղում այս պահին համեմատաբար հանգիստ իրավիճակ է:
Նելլի ԳՐԻԳՈՐՅԱՆ
Կարդացեք նաև
