Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիեւը Դմիտրի Կիսիլյովին տված հարցազրույցում պատասխանեցին այս հարցին, թե ինչպե՞ս եք գնահատում ռազմական գործողությունները՝ սկսած սեպտեմբերի 27-ից, ի՞նչ կորուստներ ունեք ու շա՞տ են գերիները:
Ալիեւը խոսելով զոհերի մասին՝ ասաց. «Այսօրվա դրությամբ մենք ունենք 43 զոհ խաղաղ բնակիչների շրջանում ու ավելի քան 200 վիրավոր, մոտ 2000 տուն կամ լիովին քանդվել են, կամ վնասվել են»: Ինչ վերաբերում է զինծառայողների շրջանում կորուստներին՝ Ալիեւը թիվ չհրապարակեց:
Իսկ ՀՀ վարչապետն ասաց. «Գիտեք, շատ բարդ իրավիճակ է հիմա ռազմադաշտում, շատ մեծ կորուստներ կան երկու կողմից էլ: Արցախի պաշտպանության բանակը իրականացնում է պաշտպանություն, իրավիճակը կարող եմ գնահատել բարդ»:
Հարցին՝ այսինքն, կորուստները, գերիների թվաքանակը դժվա՞ր է հիմա գնահատել՝ Փաշինյանը պատասխանեց, որ շատ ռազմական փորձագետներ ասում են, որ սա աննախադեպ պատերազմ է, որովհետեւ այստեղ ներգրավված են բոլոր զինատեսակները՝ տանկեր, ինքնաթիռներ, ուղղաթիռներ, հրթիռներ եւ այլն. «Այսինքն, սա շատ լայնածավալ, դաժան ռազմական գործողություններ են, այս պահի դրությամբ Արցախի պաշտպանության բանակը կարողանում է իրականացնել պաշտպանություն ու փաստացիորեն կարող ենք ասել, որ Ադրբեջանի պլանները՝ բլից կրիգով Ղարաբաղի նկատմամբ վերահսկողություն վերցնել, ձախողվել են այս պահին»:
Կարդացեք նաև
Հռիփսիմե ՋԵԲԵՋՅԱՆ
