Այսօր ՀՀ զինված ուժերի հակաօդային պաշտպանության զորքերի հրամանատարի տեղակալ Գարիկ Մովսեսյանը լրագրողներին պետք է ներկայացներ Ադրբեջանի սանձազերծած լայնածավալ ռազմական գործողություններում Թուրքիայի ներգրավվածության մասին փաստեր: Սակայն խոսքը սկսեց լուրով, թե րոպեներ առաջ մեր բանակը խոցել է հակառակորդի հերթական ՍՈՒ-25 գրոհիչը:
Գարիկ Մովսեսյանի խոսքով, թուրքական F-16 ինքնաթիռները Ադրբեջան են բերվել հուլիսին՝ թուրք-ադրբեջանական զորավարժությունների նախօրեին ու չեն վերադարձել Թուրքիա, մնացել են Գյանջայում ու դեռ ուսումնամարզական թռիչքներ են իրականացրել Վարդենիսի, Հադրութի, Ստեփանակերտի ուղղությամբ: Իսկ Ադրբեջանի սկսած պատերազմից օրեր առաջ՝ սեպտեմբերի 23-ին ինքնաթիռների հերթափոխ է իրականացվել ու նոր եկած ինքնաթիռները ակտիվ մասնակցել են մարտական գործողություններին՝ Հայաստանի եւ Արցախի ռմբակոծում եւ հրթիռակոծում:
Ապացույցներ.
1.Սեպտեմբերի 27-ին թուրքական զինված ուժերի F-16 երկու ինքնաթիռ խախտել են Հայաստանի օդային սահմանն ու ռմբակոծել Վարդենիսի Մեծ Մասրիկ եւ Սոթք բնակավայրերը:
Կարդացեք նաև
2.Սեպտեմբերի 29-ին ժամը 12:16-ի մոտ Մինգեչաուրի ջրամբարի մոտ հերթապահություն իրականացնող F-16 ինքնաթիռները նկատել են մեր ՍՈՒ-25 ինքնաթիռը, որը հանրապետության խորքից գնում էր դեպի սահման: Թուրքերը խոցել են մեր ինքնաթիռը:
Այս ամենի դեմ Հայաստանի բողոքներից հետո Թուրքիան իր ինքնաթիռները տեղափոխել է Գաբալա օդանավակայան եւ մարտական գործողություններին մասնակցում է Ադրբեջանի ռազմական ավիացիայի կազմում՝ նախ օդ են բարձրանում թուրքական, ապա ադրբեջանական ինքնաթիռները:
Այս ամենը վերլուծելով, Գարիկ Մովսեսյանը թվարկեց թուրքական օդուժի առջեւ դրված խնդիրները. Ադրբեջանի ռազմաօդային ուժերի գործողությունների համակարգում, Հայաստանին եւ Արցախին ռմբակոծելու ընթացքում աջակցում եւ գործողությունների պատսպարում:
Ի հավելումն, Ադրբեջանը կիրառում է թուրքական եւ իսրայելական ԱԹՍ-ներ:
Մինչ օրս մեր հակաօդային պաշտպանության ուժերը խոցել են թշնամու 180 օդային հարձակման միջոց, 15 ինքնաթիռ, 8 ուղղաթիռ:
Նելլի ԳՐԻԳՈՐՅԱՆ
