Ռուսական բանակի անմիջական մասնակցությունն Արցախում ընթացող ռազմական գործողություններին, այս վիճակում, ՀՀ արտակարգ եւ լիազոր դեսպան, ԼՂՀ նախկին արտգործնախարար Արման Մելիքյանը բացառում է:
Այսօր ՌԴ ՊՆ-ից լրագրողներին փոխանցել էին, որ ՌԴ պաշտպանության նախարար Սերգեյ Շոյգուն բանակցություններ է վարում տարբեր երկրների իր գործընկերների հետ՝ Լեռնային Ղարաբաղում անհապաղ հրադադարի ռեժիմ հաստատելու նպատակով: Aravot.am-ը Արման Մելիքյանից հետաքրքրվեց՝ սա նշանակո՞ւմ է, որ ռուսական բանակն անմիջական մասնակցություն է ցուցաբերելու ռազմական գործողություններին:
«Դրա անհրաժեշտությունը չկա: ՌԴ պաշտպանության նախարարը հրադադարի ռեժիմը չապահոված կողմին առանց այդ էլ շատ ծանրակշիռ ու համոզիչ փաստարկներ կարող է ներկայացնել՝ ռազմական դիվանագիտության մակարդակում»,- ասաց մեր զրուցակիցը:
Վերջին շրջանում տարբեր խոսակցություններ նաեւ են պտտվում՝ շփման գծում խաղաղապահների, մասնավորաբար ռուս խաղաղապահների տեղակայման հնարավորությունների մասին: Ի դեպ, այդ հարցի մասին նաեւ ՀՀ վարչապետ Նիկոլ Փաշինյանն էր խոսել: «Ալ Ջազիրա» հեռուստաընկերությանը տված հարցազրույցում, լրագրողի հարցին՝ Դուք կցանկանա՞ք տեսնել Ռուսաստանի խաղաղապահներին, օրինակ` Լեռնային Ղարաբաղում, վարչապետը պատասխանել էր. «Տեսեք, այդ հարցերը կարող են քննարկվել ավելի մեծ համատեքստում` ԵԱՀԿ Մինսկի խմբի շրջանակներում»:
Կարդացեք նաև
Արման Մելիքյանը դեռ վաղ է համարում խաղաղապահների տեղակայման մասին խոսելը, քանի որ՝ «արցախա-ադրբեջանական սահմանն առաջիկայում դեպի արևելք ու հյուսիս տեղաշարժվելու միտում է ցուցաբերելու»: Ըստ մեր զրուցակցի, այս թեմայով առարկայական կկարողանանք խոսել այն ժամանակ, երբ այդ գործընթացը կավարտվի:
Մոսկվայում՝ ԱԳ նախարարների եռակողմ հանդիպման ժամանակ արդեն իսկ հանրային որոշակի շրջանակներից քննադատություն հնչեց ՀՀ իշխանության հասցեին՝ ռուսական առաջարկին ընդառաջ գնալու համար: Ըստ քննադատների, ՀՀ-ն այսպիսով շարունակում է մնալ ՌԴ-ի կամակատարը: Այս առիթով էլ, Արման Մելիքյանը նկատում է. «Մարտավարական տեսանկյունից ՀՀ պահվածքը ճիշտ էր՝ ի սկզբանե էլ պարզ էր, որ թշնամին հրադադարի ռեժիմը պահպանելու շահագրգռություն չի կարող ունենալ: Մարդասիրական դադարը ձեռնտու չէր ոչ Անկարային, ոչ էլ Բաքվին և վերջիններս, խախտելով ՌԴ նախագահ Պուտինի հորդորով ու նախաձեռնությամբ ձեռք բերված պայմանավորվածությունները, հանդուգն մարտահրավեր նետեցին Ռուսաստանին: Փաստորեն, այժմ ՌԴ-ն, հանձինս նախարար Շոյգուի, այդ մարտահրավերն ընդունել է»:
Նելլի ԳՐԻԳՈՐՅԱՆ
