«Հետաքրքիր է Իրանի դիրքորոշումը: Իրանական լրատվամիջոցները հիմնականում ներկայացնում են պետական քաղաքական ուղեգիծը՝ փորձելով լինել հավասարակշռված: Բազմաշերտ Իրանում կան տարբեր կենտրոններից կառավարվող լրատվամիջոցներ, բայց, ընդհանուր առմամբ, կա հավասարակշռություն»,-«Մեդիա կենտրոն»-ում կազմակերպված քննարկման ժամանակ այսօր անդրադառնալով Արցախի դեմ Ադրբեջանի ձեռնարկած եւ Թուրքիայի անմիջական մասնակցությամբ իրականացվող պատերազմի մասին իրանական ԶԼՄ-ների լուսաբանումներին՝ ասաց «Օրբելի» կենտրոնի վերլուծաբան, արաբագետ Արմեն Պետրոսյանը:
Արմեն Պետրոսյան
Նրա բնորոշմամբ՝ եթե իրանական որոշ լրատվամիջոցներ ցուցաբերում են ավելի ադրբեջանամետ դիրքորոշում՝ առավելապես ներկայացնելով Իրանի հյուսիսի թյուրքախոս իրանցիներով բնակեցված շրջանների հոգեւոր ներկայացուցիչների եւ պատգամավորների ադրբեջանամետ տեսակետները, ապա որոշակի մակարդակներում հավասարակշռությունը պահպանվում է՝ ներկայացնելով չեզոք դիրքորոշում առ այն, որ Իրանի համար այս պահին կարեւոր է երկու հարեւանների միջեւ խաղաղության հաստատումը:
Արմեն Պետրոսյանի խոսքով՝ կարեւոր նրբություն է այն հանգամանքը, որ իրանական մամուլում մրցակցություն կա թուրքական լրատվամիջոցների հետ. «Հիմնական անդրադարձներում առկա է ակնհայտ հակաթուրքական ուղղվածություն: Ադրբեջանի հետ կապված եթե հիմնականում աշխատում են հավասարակշռությունը պահել, ապա Թուրքիայի դեպքում այդպես չէ»:
Արմեն Պետրոսյանը նաեւ շեշտեց, որ իրանական մամուլում բարձրաձայնվում է Թուրքիայի միջնորդությամբ Ադրբեջան տեղափոխված եւ Արցախի դեմ կռվող ահաբեկչական խմբավորումների սպառնալիքը:
Կարդացեք նաև
Ինչ վերաբերում է քրդական լրատվամիջոցներին, Արմեն Պետրոսյանը տեղեկացրեց՝ վերջիններս դեռեւս Տավուշի սահմանին հուլիսյան էսկալացիայի ժամանակ են գրել ահաբեկչական խմբավորումների՝ Թուրքիայի կողմից նախապատրաստվելու եւ Արցախի դեմ ուղարկվելու մասին. «Քրդական կողմի անդրադարձները հստակ փաստերով էին եւ դեռեւս սեպտեմբերի կեսին: Սա նշան էր, որ Թուրքիան եւ Ադրբեջանը համակողմանիորեն բոլոր հարթություններում նախապատրաստվում էին պատերազմի»:
Լուիզա ՍՈՒՔԻԱՍՅԱՆ
