«Առաջնային գործոններից, որի մասին շատ գրվում է, Թուրքիայի կողմից Ադրբեջանին աջակցելն ու ռազմական գործողություններում ներգրավվելն է: Եթե նախկինում դա քաղաքական-դիվանագիտական հարթակներում էր նկատվում, այսօր միջազգային ԶԼՄ-ներն ուղղակի ներգրավվածության մասին են փաստում՝ հրահանգիչների ու թուրք զինյալների մասնակցության, թուրքական զինատեսակների օգտագործման»,-«Մեդիա կենտրոն»-ում կազմակերպված քննարկման ժամանակ այսօր անդրադառնալով Արցախի դեմ Ադրբեջանի պատերազմի մասին արտասահմանյան լրատվամիջոցների լուսաբանումներին՝ ասաց «Օրբելի» կենտրոնի վերլուծաբան Իզաբել Շատոյանը:
Իզաբել Շատոյան
Նրա բնորոշմամբ՝ Թուրքիայի՝ վերջին տարիներին մի շարք տարածաշրջաններում ապակայունացնող գործելաոճը միջազգային լրատվամիջոցների ուշադրությունը կենտրոնացրել է վերջինիս վրա:
Փորձագետի խոսքով՝ միջազգային ԶԼՄ-ներն ուշադրության կենտրոնում են պահում նաեւ Արցախի դեմ պատերազմում Թուրքիայի կողմից զինյալների ներգրավումը. «Մինչեւ ռազմական գործողությունների մեկնարկը եւս միջազգային ԶԼՄ-ները գրում էին, որ թուրք-ադրբեջանական տանդեմը որոշակի պլանավորում է իրականացնում Արցախի դեմ պատերազմելու՝ հղում անելով որոշ լրագրողների գրառումներին այն մասին, որ Սիրիայում զինյալներ են հավաքագրվում, տեղափոխվում Թուրքիա, հետո՝ Ադրբեջան: Այդ ժամանակ դա քննարկումների մակարդակում էր, իսկ հիմա միջազգային ԶԼՄ-ներն ավելի հաստատ տեղեկություն են տրամադրում զինյալների տեղափոխման եւ մասնակցության մասին, հրապարակում զինյալների հետ հարցազրույցներ: Հաճախ զինյալներն անգամ տեղյակ չեն եղել, որ Ադրբեջան են տեղափոխվում պատերազմելու համար: Հարցազրույցներում նրանց մեծ մասն ասել է, որ աշխատանքի է անցել անվտանգության ոլորտի կազմակերպություններում՝ 1500-2500 դոլար ամսական աշխատավարձով»:
Շատոյանի փաստմամբ՝ զինյալների հարցը միջազգային ԶԼՄ-ներում հիմա էլ ակտիվ է, հատկապես, երբ քննարկվում են նոր խմբաքանակի մասին տեղեկությունները՝ Սիրիայից, Պակիստանից:
Կարդացեք նաև
Ամփոփելով՝ Իզաբել Շատոյանը նշեց, որ արեւմտյան մամուլի հիմնական թեզի համաձայն՝ պատերազմը սանձազերծել է Ադրբեջանը. «Կարեւոր է, որ միջազգային ԶԼՄ-ների հետ աշխատանքում մեզ հաջողվում է փոխանցել փաստեր, որոնք հաստատում են՝ Ադրբեջանը նախապես պլանավորել է այս ամենը՝ Թուրքիայի հետ պայմանավորվածությամբ»:
Լուիզա ՍՈՒՔԻԱՍՅԱՆ
