Հոկտեմբերի 12-ին ԵՄ արտաքին գործերի նախարարների` Լյուքսեմբուրգում կայացած հանդիպումից հետո տեղի ունեցած մամուլի ասուլիսում իր խոսքը ԵՄ արտաքին քաղաքականության և անվտանգության հարցերով գերագույն ներկայացուցիչ Ժոզեֆ Բորելը սկսեց Լեռնային Ղարաբաղում տեղի ունեցող իրադարձություններին անդրադարձով: Նա ԼՂ-ում տեղի ունեցող իրավիճակը գնահատեց հրատապ և խոսելով ԱԳ նախարարների հանդիպման ընթացքում այս հարցով տեղի ունեցած քննարկումների մասին՝ ասաց. «ԱԳ նախարարների հանդիպման ընթացքում Ֆրանսիայի ԱԳ նախարարը հայտարարեց, որ կարևոր է՝ կողմերը վերադառնան խաղաղ բանակցությունների:
Մենք քննարկեցինք, թե ինչպես կարող ենք հրադադարի իրականացմանն աջակցել, որի շուրջ համաձայնություն է եղել հոկտեմբերի 10-ին: Մենք կարևորեցինք, որ այս հրադադարը պետք է պահպանվի: Այս առիթով ԱԳ նախարարները նաև կարևորեցին, որ տարածաշրջանային բոլոր դերակատարները իրենց ներդրումն ունենան կանգնեցնելու զինված առճակատումը և իրենց ներդրումն ունենան խաղաղության հաստատման հարցում»:
Նշենք՝ COVID-19-ի պայմաններում Լյուքսեմբուրգում կայացած հանդիպումը՝ ԵՄ ԱԳ նախարարների առաջին դեմ առ դեմ հանդիպումն է: Նրանք քննարկեցին համաշխարհային քաղաքական իրավիճակը, օրակարգում էր նաև Լեռնային Ղարաբաղի հակամարտությունը:
Տաթև ՀԱՐՈՒԹՅՈՒՆՅԱՆ
