«Այս իրավիճակում մեկ անգամ չէ, որ ասել ենք՝ պատմական կարեւոր ու բարդ ժամանակաշրջան է մեր երկրի համար եւ չպետք է ներքաղաքական օրակարգերով առաջ գնալ»,-այսօր վարչապետի՝ արտախորհրդարանական ուժերի հետ հանդիպումից հետո լրագրողների հետ զրույցում ասաց ՀՀԿ խոսնակ Էդուարդ Շարմազանովը:
Հարցին, վարչապետը լսել է քաղաքական ուժերի տեսակետները, ի՞նչ նպատակով է դա արվում, պետք է միասնական մոտեցո՞ւմ լինի, պարոն Շարմազանովը պատասխանեց՝ իր նպատակի մասին կարող եք խոսել վարչապետի հետ կամ կառավարության ներկայացուցիչների հետ. «Ես ասացի՝ հրավեր է եղել քաղաքական ուժերին, խնդիրը Արցախում ռազմական գործողություններն էին, յուրաքանչյուր քաղաքական ուժ իր կարծիքն է արտահայտել»:
Համընկնո՞ւմ են ՀՀԿ-ի եւ վարչապետի կարծիքները Արցախի հարցում, պարոն Շարմազանովն ասաց՝ համընկնո՞ւմ են, թե՞ ոչ, պետք է հարցնեք իրենց. «Մենք մեր տեսակետը հայտնել ենք, հստակ է՝ Արցախը չի լինելու Ադրբեջանի կազմում: Իմ կարծիքով՝ պետք է անել հնարավորինը, որ հրադադարի ռեժիմն աշխատի»:
Էդուարդ Շարմազանովից հետաքրքրվեցին՝ ներկուսակցական քննարկում եղե՞լ է Արցախի հարցով, ի պատասխան ասաց՝ ես որ այսօր այստեղ եմ, բնականաբար եղել է եւ ինքնագլուխ չեմ եկել այս հանդիպմանը:
Կարդացեք նաև
Անդրադառնալով Արցախի անկախության ճանաչմանը՝ պարոն Շարմազանովն ասաց. «Իմ խորին համոզմամբ, Արցախի ճանաչումը պետք է արվի այն ժամանակ, որը օգուտ կբերի Հայաստանի դիրքերի ամրապնդմանը, եւ կլինի շարունակական միջազգային այլ ակտորների կողմից»:
Լուսինե ԲՈՒԴԱՂՅԱՆ
