Այսօր ԱԺ-ում լրագրողների հետ զրույցում ԲՀԿ պատգամավոր Միքայել Մելքումյանը, խոսելով երեկ վարչապետ Նիկոլ Փաշինյանի հետ փակ հանդիպման մասին, ասաց, որ մոտ երկու ժամվա ընթացքում բազմաթիվ հարցեր են քննարկել, այդ թվում խոսել են ելքերի մասին:
Խոսելով Արցախի ճանաչման գործընթաց սկսելու մասին՝ Մելքումյանն ասաց, որ այս փուլում Արցախի անկախության ճանաչումը դիտարկում են որպես Արցախի էթնիկ զտումը բացառող գործոն. «Ես կարծում եմ, որ հրատապ մեր ամբողջ արտաքին քաղաքականությունը պետք է ուղղվի, որ գոնե առաջիկա մի քանի օրերի ընթացքում որեւէ երկիր ճանաչի Արցախի անկախությունը, թեկուզ լատինամերիկյան, ընդունենք, Ուրուգվայը, դրանից հետո հստակ է, որ մենք պետք է անպայման ճանաչենք»:
Նա ասաց, որ Ֆրանսիայի կողմից ճանաչելը դժվար էր, որովհետեւ Մինսկի խմբի անդամ էր, բայց այս պարագայում, երբ ցեղասպանություն է կատարվում, խաղաղ կարգավորման մասին խոսք լինել չի կարող. «Մինսկի խմբի ձեւաչափը կամ պետք է փոխվի, կամ վերաիմաստավորվի»:
Ըստ Մելքումյանի, ՌԴ-ի հետ լայն թափով պետք է վերականգնենք ռազմավարական գործընկերոջ ու դաշնակցի հարաբերությունները. «ՌԴ-ի ներկայությունն այստեղ պետք է ամբողջությամբ վերականգնվի: Թուրքիան քայլ է անում Ադրբեջանին պոկի սրա միջոցով տարածաշրջանից: Եթե պոկում է, տարածքային պրոբլեմ է առաջանում, Թուրքիան ներկա է լինում տարածաշրջանում, ՌԴ-ն զիջելո՞ւ է այդ տարածքից, իհարկե, ոչ, ինքը պետք է լայն թափով արտահայտվի, զսպի ե՛ւ զինամթերքի մատակարարմամբ եւ այլ: Առաջիկա 2-3 օրերի ընթացքում շատ բան պարզաբանվելու է այս երկուսի ներկայության կամ չներկայության»:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
