Երկուշաբթի՝ հոկտեմբերի 12-ին Սյունիքի մարզի Արծվանիկի դպրոցում բնականոն սկսվել է աշխատանքային ուսումնական շաբաթը։ Հիշեցնենք, որ անցած շաբաթ օրը՝ հոկտեմբերի 10-ին հակառակորդը հարվածային անօդաչու թռչող սարք էր կիրառել Արծվանիկի ուղղությամբ։ Այդ օրը դպրոցում դասապրոցեսը դադարեցվել էր, բայց ինչպես Արծվանիկում, այնպես էլ հարակից գյուղերում խուճապ չկար։
«Բոլոր աշակերտները, ուսուցիչները ներկա են, զանգը հենց հիմա հնչեց ու սկսեցինք դասապրոցեսը։ Մեզ մոտ ամեն ինչ նորմալ է, շնորհակալ ենք, որ հետաքրքրվում եք»,– Aravot.am-ի հետ ունեցած հեռախոսազրույցում ասաց դպրոցի տնօրեն Լուսինե Հարությունյանը։
Վերջինիս զարմացավ խուճապի մասին մեր հարցից։ «Հայը, մանավանդ սյունեցին, ե՞րբ է խուճապի ենթարկվել, որ հիմա վախենա։ Ուժեղ ենք»,–ասաց տիկին Հարությունյանը՝ նշելով, որ սա նաեւ իրենց պատերազմն է, պիտի հաղթանակած դուրս գալ։ «Մեր տղերքը սահմանին՝ առաջնագծում հաղթում են, մենք թիկունքում պիտի հաղթենք, ու այս օրերին պիտի մի տառ ավելի սովորեցնենք աշակերտին, հայրենասիրություն դասեր պիտի շատ տանք վաղվա սահմանը պահողին »,–ասաց Լուսինե Հարությունյանը։
Արծվանիկ գյուղում եւս անդորր է եւ գյուղացիներն իրենց առօրյա հոգսերով են։ Ի դեպ, բացի այն, որ գյուղից կամավորներ են մեկնել առաջնագիծ, «Արծվանիկի ապագա» հասարակական կազմակերպության նախաձեռնությամբ կազմակերպվեց հանգանականություն։ Արդեն 6 մլն 738 հազար դրամ փոխանցվել է «Հայաստան» համահայկական դրամին։
Կարդացեք նաև
Արմեն ԴԱՎԹՅԱՆ
