Ազգային ժողովում այսօր առաջին ընթերցմամբ քննարկվեց «Աշխատանքային օրենսգրքում փոփոխությունների մասին» օրինագիծը, որը պայմանավորված է ռազմական դրության իրավիճակով:
Ինչպես զեկուցեց օրինագծի հեղինակ, «Իմ քայլի» պատգամավոր Հերիքնազ Տիգրանյանը՝ գործող աշխատանքային օրենսգրքում պահեստազորային կամ զորահավաքային զինծառայության դեպքերի առնչությամբ կարգավորումները բացակայում են, եւ գործատուն չունի ձեւակերպումներ, թե ինչպես է պետք վարվել աշխատանքային հարաբերություններում: «Այս օրինագծով սահմանվում է, որ զինվորական ծառայության բոլոր տեսակների դեպքում գործատուի համար մի շարք պարտավորություններ են ամրագրվում: Մասնավորապես, զորակոչի միջոցով զինծառայության մեկնած անձի աշխատատեղը պահպանվում է, աշխատողն ազատվում է աշխատանքային պարտականություններ կատարելուց, իսկ վարձատրության հետ կապված հարաբերությունները կարգավորվում են կողմերի համաձայնությամբ: Աշխատողի զորակոչման դեպքում գործատուն պարտավոր է նաեւ աշխատանքային ստաժը պահպանել»,-տեղեկացրեց հեղինակը:
Հերիքնազ Տիգրանյանը հիշեցրեց, որ «Զինվորական ծառայության եւ զինծառայողի կարգավիճակի» մասին օրենքով արդեն իսկ ամրագրված է, որ զորավարժանքների մասնակցողները պահպանում են աշխատատեղը, սակայն օրենսդրական կարգավորումից դուրս էր մնացել զորահավաքային եւ կամավոր հիմունքներով ծառայողների հարցը:
Լուիզա ՍՈՒՔԻԱՍՅԱՆ
