«Ունենք համերաշխության փխրուն մթնոլորտ, եւ եկեք դա պահպանենք: Չբերենք նախագծեր, որոնք կարող են կասկած առաջացնել: Կարծում եմ՝ հանրությունից թաքցնելու ոչինչ չունենք»,-ԱԺ նիստում այսօր հայտարարեց «Լուսավոր Հայաստանի» պատգամավոր Գեւորգ Գորգիսյանը՝ անդրադառնալով այսօր քննարկվող օրենսդրական փաթեթին:
Հիշեցնենք, որ ԱԺ-ն առաջին ընթերցմամբ քննարկում է սեպտեմբերի 27-ից կառավարության որոշմամբ հաստատված ռազմական դրության սահմանափակումների խախտման եւ միջոցառումների չկատարման համար վարչական եւ քրեական պատասխանատվություն սահմանող օրենսդրական փաթեթը, որը պատասխանատվություն է սահմանում այդ թվում կեղծ տեղեկատվության տարածման համար:
«Իհարկե, ապատեղեկատվություն, սուտ լուրեր տարածելը, պետության դեմ քայլերը պետք է պատժվեն, բայց եկեք քննադատության մակարդակն արգելելու որոշումներ չկայացնենք, որովհետեւ դա վատ տեղ է տանում»,-համոզմունք հայտնեց Գեւորգ Գորգիսյանը:
Նրա կարծիքով՝ այս օրինագիծը ժամանակավրեպ է, հանրությանը սխալ ուղերձ կհղենք սրանով. «Եկեք թափանցիկ աշխատելով առաջ գնանք եւ քննադատությունից չվախենանք: Առաջին արցախյան պատերազմը հաղթելուն մեզ որեւէ քննադատություն չի խանգարել»:
Կարդացեք նաև
Օրենսդրական փաթեթի զեկուցող, ՀՀ արդարադատության նախարար Ռուստամ Բադասյանն ի պատասխան վստահեցրեց, որ կառավարությունն ինչպես արտակարգ դրության, այնպես էլ ռազմական դրության ժամանակ թափանցիկ է եղել եւ ի տարբերություն հակառակորդի՝ մեր հանրությունից որեւէ տեղեկություն չի թաքցնում. «Այս օրինագծի նպատակն է՝ հանրային համերաշխության դեմ ոտնձգող որոշ գործիչների, ուժերի, անհատների կեղծ, խուճապ առաջացնող տեղեկությունների տարածումը, հակապետական գործունեությունը կանխարգելելը»:
Գեւորգ Գորգիսյանի խոսքով՝ ստացվում է, որ քննադատելը հետեւանքներ է ունենալու այն դեպքում, երբ, օրինակ` պատգամավորը քննադատի քաղաքապետարանի աշխատանքը, որով չի ապահովվում թաքստոցների մասին հանրային իրազեկումը, կամ քննադատի զրահաբաճկոն չունենալու մասին որեւէ պաշտոնյայի հայտարարությունը:
Ռուստամ Բադասյանը պարզաբանեց, որ պատասխանատվություն է նախատեսում կոնկրետ արարքների համար. «Պաշտոնատար անձանց, այդ թվում՝ պատգամավորի քննադատության վրա սա ազդեցություն չունի, իսկ քրեական պատասխանատվությունը հետեւանքի համար է: Ուստի խոսքն ազատ խոսքի սահմանափակման մասին չէ, այլ, օրինակ, սրա՝ զորքերը գալիս են, նահանջեք…»:
Լուիզա ՍՈՒՔԻԱՍՅԱՆ
