«Ես գրեթե համոզված եմ՝ եթե նույնիսկ արցախյան իրադարձությունները չլինեին, միեւնույն է, «Ֆիթչն» իր ռեյտինգն իջեցնելու էր»,-Aravot.am-ի հետ զրույցում այսպիսի կարծիք հայտնեց ACSES վերլուծական կենտրոնի ղեկավար, տնտեսագետ Հայկազ Ֆանյանն՝ անդրադառնալով «Ֆիթչ» վարկանշային կազմակերպության՝ Հայաստանի վարկանիշների վերաբերյալ հերթական ամփոփմանը: «Ֆիթչ»-ն իջեցրել է Հայաստանի՝ արտարժույթով թողարկողի դեֆոլտի երկարաժամկետ վարկանիշը (IDR) ՝ «BB-» – ից դարձնելով «B +»՝ կայուն հեռանկարով:
Վարկանշային աղյուսակում խոսք չկա Ադրբեջանի եւ Թուրքիայի մասին: Մեր հարցին, Հայկազ Ֆանյանը պատասխանեց, որ Ադրբեջանի համար վարկանիշը հրապարակվել է այս տարվա հուլիսին, իսկ Թուրքիայի համար՝ օգոստոսին. ««Ֆիթչ»-ը, որպես կանոն, հրապարակում է ժամանակացույցով եւ կարծում եմ, որ այդ երկրների համար դեռ ժամանակը չէ: Հայաստանի մասով մի քանի օր ուշացել է, բայց հրապարակումը տեղի է ունեցել»:
Ըստ պարոն Ֆանյանի, «Ֆիթչի» որոշումը մի քանի գործոններով է պայմանավորված, եւ խոսքն այն գործոնների մասին են, որոնք կապված չեն Արցախյան երկրորդ պատերազմի հետ:
«Երբ կարդում ենք «Ֆիթչ»-ի նկարագրական մասը, խոսքը գնում է COVID-19-ի եւ նրա հետեւանքների մասին: Մասնավորապես՝ կանխատեսվում է, որ տեղի կունենա ՀՆԱ-ի իրական ծավալի անկում՝ 6,2 տոկոսով այնինչ, նախկինում կանխատեսում էին 0,5 տոկոս աճ: Միեւնույն ժամանակ իրենք ակնկալում են, որ պետական պարտքի մակարդակը կբարձրանա այս պարագայում: Իրենք նաեւ միջնաժամկետում կանխատեսում էին, որ պետական պարտքի մակարդակը կիջնի, սակայն, ըստ էության, կա որոշակի անորոշություն դրա հետ կապված, քանի որ նաեւ Արցախի երկրորդ պատերազմով պայմանավորված հնարավոր է կառավարությունը ծախսեր իրականացնի: Այդ թվում՝ COVID-19-ի երկրորդ ալիքի համար դեպքերի ավելացումը կարող է առաջացնել կարիք՝ չեզոքացման նոր միջոցառումներ կիրառելու: Եվ այդ ֆոնի վրա է, որ «Ֆիթչը» որոշել է Հայաստանի ռեյտինգն իջեցնել»:
Կարդացեք նաև
Կազմակերպությունից նշել են նաեւ, որ Լեռնային Ղարաբաղում վերջին լայնամասշտաբ ռազմական գործողություններն ավելի ինտենսիվ են, քան 2016-ի վերջին խոշոր առճակատումը: Իսկ Թուրքիայից Ադրբեջանին տրվող աջակցությունը մեծացնում է անորոշությունը եւ ռիսկը, որ հակամարտությունն այս անգամ ավելի շատ կձգձգվի:
Լուսինե ԲՈՒԴԱՂՅԱՆ
