«Հայկական կողմն ամեն ինչ պետք է անի, որպեսզի մարտի դաշտում ձեռքբերումն իրական մակարդակում արձանագրվի: Ավելին չեմ կարող ասել»,-լրագրողների հետ ճեպազրույցում այսօր անդրադառնալով Արցախի հարցով կողմերի միջեւ սպասվելիք հնարավոր հանդիպումներին՝ ասաց «Լուսավոր Հայաստան» խմբակցության ղեկավար Էդմոն Մարուքյանը:
Նա շեշտեց՝ խորհրդարանական ընդդիմությունը սպասվելիք հանդիպումների օրակարգի մասին տեղեկություններ չունի, ուստի գնահատականներ հնչեցնել չի կարող. «Բայց մարտի դաշտում ձեռքբերումները պետք է արձանագրվեն բանակցային սեղանի շուրջ: Սա մենք չենք հնարել: Սա այն է, ինչ ամբողջ աշխարհում կա»:
Մարուքյանի բնորոշմամբ՝ այս հարցում կարեւոր է Ստեփանակերտի այն դիրքորոշումը, որ Արցախը պետք է լինի բանակցային կողմ. «Արցախը պետք է շարունակի պնդել, որ պետք է մասնակցի բանակցություններին, եւ դա ամրագրված է 1994թ.-ի զինադադարի փաստաթղթով: Հրադադարի կողմն Արցախն է, Հայաստանը պատերազմի մեջ չի, Հայաստանը երաշխավորում է Արցախի ժողովրդի անվտանգությունը եւ թույլ չի տալիս, որպեսզի Արցախի ժողովրդին ենթարկեն ցեղասպանության»:
Ըստ Էդմոն Մարուքյանի՝ քանի դեռ մարտական գործողությունները չեն ավարտվել, քանի դեռ կրակն առաջնագծում չի դադարել, հնարավոր չէ ասել, թե բանակցությունների սեղանին ինչը պետք է ուժի մեջ մնա, ինչը՝ ոչ:
Կարդացեք նաև
Լուիզա ՍՈՒՔԻԱՍՅԱՆ
