Այսօր ՀՀ վերաքննիչ դատարանը՝ Ռուզաննա Բարսեղյանի նախագահությամբ, ուժի մեջ թողեց «Բարգավաճ Հայաստան» կուսակցության ղեկավար, ԱԺ պատգամավոր Գագիկ Ծառուկյանի խափանման միջոցի մասով առաջին ատյանի դատարանի կայացրած որոշումը: Գագիկ Ծառուկյանը կմնա կալանավորված: Առաջին ատյանի դատարանի որոշումը հիմնված էր նրա վրա, որ ազատության մեջ լինելով Գագիկ Ծառուկյանը կխոչընդոտի քննությանը: Վերաքննիչ դատարանը նաեւ այս հիմքն է թողել անփոփոխ:
Լրագրողների հետ զրույցում, Գագիկ Ծառուկյանի պաշտպանական խմբի անդամ Երեմ Սարգսյանը խայտառակություն է որակում այդ որոշումը: Պաշտպանը խոստացավ մի օր փաստերով բացահայտել, թե «ինչպես այս ամեն ինչը գծագրեցին եւ այսօր հասան սրան»: Նրան զարմացնում է դատական նիստերի ընթացքը, դատավորի վարքագիծը, դատախազին ուղղված հարցերը, թե՞ ազատության մեջ լինելով, եղե՞լ են դեպքեր, երբ Գագիկ Ծառուկյանը խոչընդոտել է քննությանը եւ ստանում է բացասական պատասխան, ապա նման որոշում է կայացնում:
Հիշեցնենք, Գագիկ Ծառուկյանը կալանքի տակ է սեպտեմբերի 25-ից եւ մեղադրվում է 2017-ի խորհրդարանական ընտրությունների ժամանակ ընտրակաշառք տալը կազմակերպելու մեջ: Ծառուկյանն իրեն մեղավոր չի ճանաչել եւ բազմիցս հայտարարել է, որ քաղաքական հետապնդման զոհ է դարձել կառավարության հրաժարականը պահանջելու համար:
Գագիկ Ծառուկյանի պաշտպանական խմբի անդամները շարունակում են պնդել, որ քաղաքական հետապնդումը՝ դատական իշխանության ձեռքերով, մեր երկրում շարունակվում է:
Կարդացեք նաև
Նելլի ԳՐԻԳՈՐՅԱՆ
