«Ցավալի փաստ է, որ այսօրվա դրությամբ մեր թշնամին արդեն հասել է այն սադրանքին, որ ռմբակոծում է քաղաքները և գյուղերը»,- լրագրողների հետ հանդիպման ընթացքում ասաց Ստեփանակերտի փոխքաղաքապետ Սուրեն Թամրազյանը։
Նա նշեց, որ Ստեփանակերտում ուսումնասիրվում են բոլոր ավերվածությունները և վնասները, և որոշվում է այդ կրված վնասների աստիճանը․ «Այսօրվա դրությամբ Ստեփանակերտում բոլոր ենթակառուցվածքները շարունակում են աշխատել իրենց հունով, և որևէ խուճապի կամ այլ պայմանների խնդիր չկա։ Միանշանակ, եթե տապալվում է ինչ-որ մի ենթակառուցվածք, ապա մեր մասնագետները տեղում փորձում են վերացնել այդ բոլոր վնասները, և փորձում են այսօրվա դրությամբ ապահովել քաղաքի բնականոն կյանքը»։
Սուրեն Թամրազյանը հայտնեց, որ էլեկտրաէներգիայի հետ կապված բոլոր խոչընդոտները վերացվել են։ Իսկ գազը անջատվել էր անվտանգության նկատառումներից ելնելով․ «Այս պահին աշխատանքները տարվում են առաջիկա 1-2 օրվա ընթացքում Ստեփանակերտում անջատումներ չեն լինելու, ջրամատակարարումը ապահովվում է շուրջօրյա, միանշանակ չի խափանվելու»։
Նա հավելեց, որ քաղաքի բնակչության 50-60 տոկոսը Ստեփանակերտում է այս պահին, և քաղաքից գնացել են տարեցները և երեխաները և նրանք, ովքեր առողջական խնդիրներ ունեն։ Եվ Ստեփանակերտ եկել են նաև Արցախի այլ հատվածի բնակիչներ։ Սուրեն Թամրազյանի խոսքով՝ այս պահի դրությամբ մոտ 10 բնակելի շենք է վնասվել Ստեփանակերտում, կան նաև վնասված փողոցներ, բայց քաղաքապետարանը գրեթե վերանորոգել է դրանք։
Կարդացեք նաև
Ամի ՉԻՉԱԿՅԱՆ
