«Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացումների օրինագծով, որը հեղինակել է կառավարությունը, սահմանվում է՝ սոցփաթեթից օգտվողները հնարավորություն կունենան դրա համար նախատեսված գումարը փոխանցել «Հայաստան համահայկական հիմնադրամին»՝ Արցախին օգնելու նպատակով: Օրինագիծն ԱԺ-ում այսօր քննարկվում է երկրորդ ընթերցմամբ:
Հիշեցնենք, որ օրենքն արգելում էր չօգտագործած սոցփաթեթի գումարն այդ նպատակին հատկացնելը, եւ այժմ այն հնարավոր կլինի նաեւ հիմնադրամին փոխանցել:
«Անձինք ցանկություն ունեին այդ գումարները տրամադրելու, բայց օրենքը թույլ չէր տալիս, ու սրանում էր օրինագծի հրատապությունը: Փոփոխությունը գործելու է մեկ տարի ժամկետով»,-ասաց օրինագծի հարակից զեկուցող, «Իմ քայլի» պատգամավոր Նարեկ Զեյնալյանը:
«Իմ քայլի» պատգամավոր Սոֆյա Հովսեփյանն էլ նկատեց՝ օրենքի առաջին ընթերցման ժամանակ պետական աշխատողների մոտ արդեն իսկ ոգեւորություն էր. «Վաղվանից հնարավոր է գնալ բանկ եւ փոխանցում կատարել հիմնադրամի հաշվեհամարին: Եթե այդպես չէ, խնդրում եմ ուղղել»:
Կարդացեք նաև
Նարեկ Զեյնալյանն էլ հստակեցրեց՝ օրենքը ուժի մեջ է մտնում ընդունումից անմիջապես հետո, որին հաջորդելու է կառավարության կողմից կարգի հաստատումը, ինչից հետո էլ հնարավոր կլինի փոխանցումներն անել:
Ազգային ժողովը միաձայն կողմ քվեարկեց օրինագծի ընդունմանը:
Լուիզա ՍՈՒՔԻԱՍՅԱՆ
