ԲՀԿ, «Հայրենիք» եւ ՀՅԴ ընդդիմադիր կուսակցությունները հոկտեմբերի 8-ին Երեւանում համազգային հանրահավաք էին հրավիրել: Սակայն Արցախի դեմ Ադրբեջանի եւ Թուրքիայի սանձազերծած ահաբեկչական պատերազմը խառնեց բոլոր ծրագրերը: Հայաստանի իշխանությունները ամբողջ երկրի տարածքում հայտարարեցին ռազմական դրություն, ինչն օրենքի ուժով արգելում է հանրահավաքների անցկացումը:
Վաղը՝ հոկտեմբերի 8-ին հայտարարված հանրահավաքի օրն է, սակայն ընդդիմադիր եռյակը որեւէ հայտարարություն չի արել:
Aravot.am-ը «Հայրենիք» կուսակցության խորհրդի անդամ Արսեն Բաբայանից հետաքրքրվեց, թե ի՞նչ են մտադիր անել. «Մենք հոկտեմբերի 8-ին նախատեսված հանրահավաքը չենք չեղարկել: Քանի որ ռազմական դրության ժամանակ հանրահավաքներ կազմակերպել չի կարելի, մենք իրազեկումից հետո դիմել ենք քաղաքապետարան եւ հայտնել, որ այս պահին չքննարկեն մեր իրազեկումը՝ մինչեւ ռազմական դրության ավարտը, որից հետո մենք լրացուցիչ կանդրադառնանք»,-պատասխանեց Արսեն Բաբայանը:
Աշոտ ՀԱԿՈԲՅԱՆ
