«Այս պատերազմի երկրորդ, երրորդ օրերից սկսած՝ միջազգային խաղացողների եւ ընդհանրապես միջազգային մամուլի եւ հանրության շրջանում որոշակի ընկալման փոփոխություն տեղի ունեցավ ղարաբաղյան հակամարտության վերաբերյալ, մեզ համար ձեռնտու փոփոխություն: Աշխարհն ընդունեց այն փաստը, որ Թուրքիան ներգրաված է պատերազմի մեջ ու նաեւ տեռորիստներ է ներգրավել»,- այսօր ԱԺ-ում լրագրողների հետ զրույցում ասաց ԱԺ արտաքին հարաբերությունների հանձնաժողովի նախագահ Ռուբեն Ռուբինյանը: Ըստ նրա դիվանագիտական առումով սա շատ դրական է մեզ համար ու մեծ հնարավորությունների տեղ է բացում:
«Հիմա, անկախ դիվանագիտական հաջողություններից, ամենակարեւորը՝ ռազմաճակատում եւ թիկունքում պինդ կանգնելն է, որովհետեւ մեր դիվանագիտությունը կարող է հաջողել այն դեպքում, թե մենք, որպես ժողովուրդ ու որպես ԶՈՒ, պինդ կանգնենք»,- ասաց Ռուբինյանը:
Հարցին՝ երեկ ՆԱՏՕ-ի գլխավոր քարտուղարը հանդիպեց Թուրքիայի արտգործնախարարի եւ նախագահի հետ, ի՞նչ է ակնկալվում այս հանդիպումից եւ երկուստեք հայտարարությունները ինչպե՞ս կմեկնաբանեք՝ Ռուբինյանը պատասխանեց. «Վերջին շրջանում Թուրքիայի հայտարարությունների վերաբերյալ նոր ասելիք չկա: Թուրքիան անցել է բոլոր կարմիր գծերը եւ վերածվել է տեռորիստ պետության: Մենք բոլորից ակնկալում ենք շատ կոշտ հանդիմանում ու կոշտ քննադատություն՝ Թուրքիայի եւ Ադրբեջանի այս հակաօրինական, հակահումանիստական եւ ագրեսիվ գործողություններին: Մնացած առումով կտեսնենք»:
Խոսելով դաշնակից պետությունների մասին՝ Ռուբինյանն ասաց. «ԵԱՀԿ Մինսկի խմբի նախագահները եւ բնականաբար առաջին հերթին ՌԴ-ն կկատարի իր կարեւոր դերը այս տարածաշրջանում խաղաղություն ապահովելու»:
Կարդացեք նաև
ՌԴ արտգործնախարարը հայտարարել է, որ պատրաստ է կազմակերպել երկու երկրների արտգործնախարարների հանդիպում՝ ԵԱՀԿ Մինսկի խմբի համանախագահների մասնակցությամբ, թե պաշտոնական Երեւանն ի՞նչ տեղեկություն ունի, նման հանդիպում սպասվո՞ւմ է՝ Ռուբինյանը պատասխանեց. «Այդպիսի տեղեկություն ես չունեմ»:
Նիկոլ Փաշինյանը այս օրերին մի քանի հեռախոսազրույց է ունեցել ՌԴ նախագահ Պուտինի հետ, մեր հարցին, թե ի՞նչ է ակնկալվում ՌԴ-ից, կա՞ մի բան, որ պետք է անի ՌԴ-ն ու չի անում՝ Ռուբինյանը պատասխանեց. «Մենք վստահ ենք, որ մեր բարեկամները, առաջին հերթին ՌԴ-ն իր կայունացնող դերն այս տարածաշրջանում կկատարի»:
Հռիփսիմե ՋԵԲԵՋՅԱՆ
