«Հելսինկյան նախաձեռնություն-92» Լեռնային Ղարաբաղի կոմիտեի համակարգող, խաղաղության եւ մարդու իրավունքների միջազգային մրցանակների դափնեկիր, արցախցի իրավապաշտպան Կարեն Օհանջանյանը հարցազրույց է տվել հոլանդական հեղինակավոր «nrc.nl» պարբերականին, որը մեծ արձագանք է ստացել եվրոպական մի շարք երկրներում:
Նա հարցազրույցում, մասնավորապես ասել է. «Այստեղ մարդիկ են զոհվում: Իրականում այստեղ՝ Արցախում, մարդկության հիմնարար արժեքների ճգնաժամ է արձանագրվել: Գոյություն չունեն միջազգային միջպետական ինստիտուտները, ոչ կառավարական կազմակերպությունները, միջազգային իրավապաշտպան կազմակերպությունները: Գոյություն ունի միայն ազնիվ մարդկանց խումբ, որոնք սրտի խորքում համակրում են այն գործընթացները, որոնք այսօր տեղի են ունենում Արցախում եւ նրանք կանգնած են մեր կողքին, քանի որ գիտակցում են, որ մենք այստեղ սատարում ենք ու պայքար ենք մղում համամարդկային արժեքների համար: Այստեղ՝ Արցախում, ձեւավորվում է միջազգային հանրության ու համամարդկային արժեքների նոր օրակարգ»:
