Արցախի մարդու իրավունքների պաշտպան Արտակ Բեգլարյանը ճեպազրույցում ներկայացրեց սեպտեմբերի 27-ից մինչեւ հոկտեմբերի 4-ը Ադրբեջանի զինված ուժերի կողմից Արցախի Հանրապետության քաղաքացիական բնակչության հանդեպ կատարված հանցագործություններն ու դրանց հետեւանքները, նաեւ հանդես եկավ որոշ գնահատականներով: Նա հիշեցրեց, որ սեպտեմբերի 27-ից ադրբեջանական զինված ուժերը լայնածավալ պատերազմ են սկսել Արցախի Հանրապետության դեմ՝ բոլոր ուղղություններով, հրետանահրթիռային միջոցներով, հետագայում նաեւ օդուժի միջոցով թիրախավորել են քաղաքացիական բնակավայրերն ու քաղաքացիական օբյեկտները, ենթակառուցվածքներն ու քաղաքացիական բնակչությանը:
«Սեպտեմբերի 27-ին եւ հետագա օրերին Արցախի Հանրապետությունում պարբերաբար գրանցվում են մարդկային զոհեր, վիրավորումներ, լայնածավալ գույքային վնասներ՝ ներառյալ կենսական նշանակության ենթակառուցվածքները»,- հայտնեց Արտակ Բեգլարյանը:
Արցախի մարդու իրավունքների պաշտպանը վիճակագրություն ներկայացրեց, որը թարմացված էր հոկտեմբերի 4-ի դրությամբ, միաժամանակ նշեց, որ հոկտեմբերի 5-ին եւս շարունակվել է քաղաքացիական բնակչության դիտավորյալ թիրախավորումը եւ հիմնական թիրախը եղել է Ստեփանակերտի բնակչությունը, տեղի քաղաքացիական օբյեկտներն ու ենթակառուցվածքները, հնարավոր զոհերի եւ վիրավորումների մասով տվյալները դեռեւս ճշտվում են:
«Սեպտեմբերի 27-ից սկսած մինչեւ երեկ զոհվել է 19 քաղաքացիական անձ, որոնցից մեկը երեխա, 7-ը կին, 11-ը՝ տղամարդիկ: Այս պահին մի քանիսի վերաբերյալ որոշակի անձնական տվյալներ ճշտելու փուլում ենք, այդ պատճառով չենք կարող հստակ ասել, թե քանիսն ինչ տարիքի են, բայց 19-ի կեսը 50 տարեկանից բարձր անձինք են, տարեցներ»,-ասաց նա:
Կարդացեք նաև
Արցախի մարդու իրավունքների պաշտպանի փաստմամբ՝ վիրավորումները կամ մահերը վրա են հասել հրետանահրթիռային հարվածներից, կան դեպքեր՝ անօդաչու թռչող սարքի հարվածից, որոշ դեպքերում՝ հրթիռային բարձր դիպուկությամբ , կան դեպքեր էլ, որ մարդիկ զոհվել կամ վիրավորվել են օդուժի հարվածներից՝ ռմբահարումների հետեւանքով.«Տարբեր փորձագետների ընդգրկմամբ՝ անընդհատ վերլուծում ենք, թե ինչ զինատեսակներ են կիրառվել, որպեսզի հետագայում ավելի մանրամասն վերլուծություններ կատարենք»:
Արտակ Բեգլարյանը նշեց, որ զոհերի ճնշող մեծամասնության պարագայում եղել է դիտավորյալ թիրախավորում՝ քաղաքացիական բնակչությանը. « Օրինակ, Հադրութ քաղաքում հենց բնակելի տան վրա է խփել անօդաչու թռչող սարքը»: Նա օրինակ բերեց նաեւ վերջին օրերին Ստեփանակերտի հրթիռակոծությունը՝բարձր դիպուկությամբ հրթիռների կիրառմամբ, ադրբեջանական ուժերը խփել են բնակելի շենքերին:
Արցախի ՄԻՊ-ը հավելեց, որ ավելի քան ութսուն վիրավոր կա, որոնցից 60-ը լուրջ վիրավորում է ստացել: Այս դեպքերից 48-ը տղամարդիկ են, 12-ը կանայք, կան նաեւ երեխաներ:
«Ստեփանակերտ քաղաքում վիրավորումները եղել են 22-ը, վիրավորների թվով երկրորդ տեղում Մարտունի քաղաքն է, հետո Մարտակերտը, ապա մի շարք բնակավայրեր ու Հադրութը: Ստեփանակերտ քաղաքը հիմնական թիրախի տակ է եղել, ինչը ապացուցում է, որ Ադրբեջանը նպատակ է ունեցել խիտ բնակեցված հատվածներին հարվածել, մեծ մարդկային եւ նյութական վնասներ հասցնել, խուճապի եւ ահաբեկման նպատակներ է հետապնդել»,-ասաց Արտակ Բեգլարյանը: Ընդգծեց, որ հրթիռահրետանային միջոցով ադրբեջանական կողմը ցանկացել է թիրախավորել հատկապես Ստեփանակերտի եւ Արցախի Հանրապետության մի շարք այլ բնակավայրերի կենսական նշանակության ենթակառուցվածքները՝ ներառյալ էներգամատակարարման համակարգերը, կապի միջոցները, ջրատար համակարգերը, որոշակի վնասներ է կրել նաեւ գազատար համակարգը:
Գոհար ՀԱԿՈԲՅԱՆ
