ԵԱՀԿ Մինսկի խմբի համանախագահ երկրները ներկայացնող Ռուսաստանի Դաշնության արտգործնախարար Սերգեյ Լավրովը, Ֆրանսիայի Եվրոպայի և արտաքին գործերի նախարար Ժան-Իվ Լե Դղիանը և ԱՄՆ պետքարտուղար Մայքլ Պոմպեոն ամենավճռական կերպով դատապարտում են Լեռնային Ղարաբաղի հակամարտության գոտում և դրա սահմաններից դուրս բռնության աննախադեպ և վտանգավոր էսկալացիան, ասվում է արտգործնախարարների հայտարարության մեջ:
Նախարարներն աներկբա ընդգծում են, որ վերջին հարձակումները, որոնց թիրախը ենթադրաբար քաղաքացիական օբյեկտներն էին՝ ինչպես շփման գծի երկայնքով, այնպես էլ Հայաստանի և Ադրբեջանի տարածքներում՝ Լեռնային Ղարաբաղի հակամարտության գոտու սահմաններից դուրս, ինչպես նաև այդպիսի հարձակումների ոչ համաչափ բնույթը անընդունելի վտանգ են իրենցից ներկայացնում տարածաշրջանի կայունությանը:
Հիմք ընդունելով ԵԱՀԿ Մինսկի խմբի համանախագահ երկրների նախագահների՝ հոկտեմբերի 1-ի հայտարարությունը՝ նախարարները կրկին կոչ են անում հակամարտող կողմերին անհապաղ և առանց նախապայմանների կրակի դադարեցման ռեժիմ հաստատել:
Համանախագահ երկրները խստորեն հակված են լիարժեք իրականացնել ԵԱՀԿ-ի և միջազգային հանրության կողմից օժտված իրենց մանդատը՝ Մինսկի խմբի անդամ երկրների աջակցությամբ: Ըստ այդ մանդատի՝ նրանք կշարունակեն հետևողականորեն զարգացնել փոխադարձ գործողությունները կողմերի հետ՝ կոչ անելով նրանց անհապաղ պատասխանատվություն ստանձնել՝ վերսկսելու կարգավորման գործընթացը գոյություն ունեցող հիմնարար սկզբունքների հիման վրա և համապատասխան միջազգային փաստաթղթերին, որոնք լավ հայտնի են երկու կողմերին:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
