Սերբիայում ՀՀ դեսպան Աշոտ Հովակիմյանը հարցազրույց է տվել «Tanjug» լրատվական գործակալությանը:
Հայաստանը հավատարիմ է Լեռնային Ղարաբաղի հակամարտության բացառապես խաղաղ ճանապարհով կարգավորմանը ԵԱՀԿ Մինսկի խմբի համանախագահների միջնորդական առաքելության ներքո, որում ընդգրկված են Ֆրանսիան, ԱՄՆ-ն և Ռուսաստանը: Այս մասին «Tanjug»- ին ասել է Սերբիայում ՀՀ դեսպան Աշոտ Հովակիմյանը:
Նա նշում է, որ Հայաստանը պահանջում է այս գործընթացից հետ կանչել Թուրքիային, որն, ինչպես ինքն է ասում, «ոչ միայն սատարում է Ադրբեջանին, այլև լայնորեն ընդգրկվում է ռազմական հակամարտության մեջ»:
Դեսպանի երկրորդ կոչը՝ տարածաշրջանից ահաբեկիչներին ամբողջովին վտարելն է. «Նրանք կռվում են Ադրբեջանի կողմից, և ամբողջ միջազգային հանրությունը պետք է այդ իրողությունը դատապարտի»,- նշեց Հովակիմյանը՝ ուշադրություն հրավիրելով այն փաստի վրա, որ ներկայումս Հայաստանը պայքարում է այդ տարածքում միջազգային ահաբեկչության դեմ՝ պաշտպանելով տարածաշրջանային անվտանգությունը:
Կարդացեք նաև
Դեսպանը հակամարտությունը որակավորում է որպես Ադրբեջանի «ագրեսիա», և նշում է, որ դա ոչ թե հակամարտություն է՝ Հայաստանի և Ադրբեջանի, այլ Լեռնային Ղարաբաղի և Ադրբեջանի միջև, որում՝ «Հայաստանն, իհարկե, աջակցում է Լեռնային Ղարաբաղի իր հայրենակիցներին»:
Ինչպես բացատրում է դեսպանը, դա մի ազգի գոյության ու գոյատևման հարց է: «Մենք թույլ չենք տա, որ Թուրքիան հարյուր տարի անց կրկին ցեղասպանություն իրականացնի հայերի նկատմամբ, և դա ես բացահայտ եմ ասում: Մենք դա թույլ չենք տա: Ես միջազգային հանրությանը կո՛չ եմ անում զսպել Թուրքիային, քանի որ այժմ արդեն պարզ է, որ այն ամենը, ինչ անում է Ադրբեջանը, արվում է Թուրքիայի անմիջական հրահանգով, ինչպես ռազմական, այնպես էլ քաղաքական առումով»,- եզրափակում է Սերբիայում Հայաստանի ոչ ռեզիդենտ դեսպանը Պրահայից:
