Երկուշաբթի՝ հոկտեմբերի 5-ին, ՀՀ արդարադատության նախարարության քրեակատարողական ծառայության վարչական շենքի մերձակա հրապարակից հանդիսավորությամբ ռազմաճակատ մեկնեց ՔԿԾ կամավորական վաշտը։ Վաշտի տղաներին հաղթանակած ու բարի վերադարձ մաղթեցին ՀՀ արդարադատության նախարար Ռուստամ Բադասյանն ու ՔԿԾ պետ, արդարադատության գեներալ-մայոր Արթուր Գոյունյանը։
«Բոլորիդ մաղթում եմ քաջառողջություն, անկոտրում ոգի եւ թշնամուն ջախջախիչ հարված հասցնելուց ու վերջնական պարտության մատնելուց հետո՝ անկորուստ վերադարձ մեր շարքերը»,- ճանապարհելուց առաջ ասել է ծառայության պետը՝ ընդգծելով, որ հաղթանակը մերն է լինելու։
Քրեակատարողական հիմնարկները ռազմավարական կառույցներ են համարվում եւ փորձեցինք ՔԿԾ-ից ճշտել, արդյոք աշխատակիցների առաջնագիծ մեկնելուց չի՞ խոչընդոտվելու ծառայությունը քրեակատարողական հիմնարկներում։
Ըստ ՔԿԾ հանրային կապերի բաժնի պետ, փոխգնդապետ Նոնա Նավիկյանի, նախ՝ Ծառայությունը գիտի իր անելիքը՝ չի տուժի։ «Եվ հետո, բացի դրանից՝ քրեակատարողական հիմնարկներում այս օրերին կտրուկ նվազել են նաեւ կարգապահական խախտումների, ինքնավնասումների ու հացադուլների դեպքերը։ Կալանավորված անձինք ու դատապարտյալները որոշել են այդպես ոգեշնչել մեր ազգին ու Հայոց բանակին»,–մեզ հետ զրույցում ասաց տիկին փոխգնդապետը։
Կարդացեք նաև
Արմեն ԴԱՎԹՅԱՆ
