Ինչպես հայտնի է, Ստեփանակերտում Ադրբեջանի հարվածից բնակելի շենքեր են վնասվել։
Հարվածի հաջորդ օրը Aravot.am-ը կրկին այցելեց այդ շենքեր։
Բնակիչները շենքի տարածքում էին, նրանցից ոմանք եկել և ցելոֆանով փակում էին իրենց տան պատուհանները, մեքենաները։ Պայմաններ ստեղծում, որ կարողանան տեղափոխվել և ապրել իրենց տներում։
Արթուր Ադամյանը դեպքի պահին ընկերների հետ նշել է իր 54 ամյակը․ «Հաց էինք կերել, ուզում էինք սուրճ խմել, մեկ էլ լսեցինք պայթյուն։ Ալիքը ուժեղ էր, զգացինք, որ մոտիկ է, բայց չէինք տեսնում։ Մինչև աչքովդ չես տեսնում, չես հավատում։ Դուրս եկանք տեսանք տանիքին է խփել ուժեղ»։
Կարդացեք նաև
Բնակիչները անմիջապես տեղափոխվել են ապաստարան, սակայն Արթուրը գիշերը վերադարձել է իր բնակարան․ «Դուխից չենք ընկել։ Ուղղակի ուզում են վախեցնել, դա իրենց մոտ չի ստացվի։ Իրենց ֆանտազիան է, թե իբր ուժեղ են զենքով, բանով, բայց ժամանակավոր բան է՝ 1 օր, 2 օր, 3 օր։ Ժամանակավոր բան է, սաղ լավ է լինելու, տարիքով մի քիչ մեծ եմ չեն կանչում կռիվ, միշտ պատրաստ եմ, երբ որ կանչեն, կգնամ։ Սաղ լավ է լինելու»։
Հարվածից վնասվել են տան պատուհաները․ «Դա չնչին բան է։ Նյութականը վնաս չէ՝ տունն էլ է սարքվող, ավտոն էլ է սարքվող։ Լավ է լինելու, ոչ ոք չի վախենում, ուղղակի խաղաղ բնակիչների վրա են խփում, սուտ ասելով էլ ման են գալիս, բայց դե մեկ է աշխարհը գիտի, որ սուտ են ասում»։
Ամի ՉԻՉԱԿՅԱՆ
Լուսանկարները՝ Նարեկ Ավագյանի
