Բանաստեղծ, փիլիսոփայական գիտությունների դոկտոր Սլավի Ավիկ Հարությունյանը տեղեկացրեց, որ իր մոսկվացի ընկեր Կարո Դալլաքյանը գումար է փոխանցել իր հաշվին եւ առաջարկել ուղղել՝ ըստ անհրաժեշտության. «Whatsapp-ով գրել է՝ մի փոքր օգնություն է, տնօրինիր ըստ քո հայեցողության: Գումարն, իհարկե, փոքր չէր, եւ ես այն բաժանեցի իրապես դրա կարիքն ունեցողներին: Կարո Դալլաքյանը շարունակում է դրամահավաքը Մոսկվայում: Նրան են միացել այլ մոսկվացի ընկերներ, ինչպես ազգությամբ հայեր՝ Արամ Շահնազարյանը, Կարոյի որդի Կարենը, այնպես էլ ռուսներ՝ օրինակ` Վիկտոր Կրուգլյակովը, որը 50000 ռուբլի է փոխանցել: Ասում են՝ տաճարները կառուցվում են համատեղ ուժերով»:
Սլավի Ավիկ Հարությունյանը նշում է, որ կարեւոր չէ՝ օգնություն տրամադրողը հարուստ է, թե ոչ, ամեն մեկն իր ներդրումը պետք է ունենա հատկապես պատերազմի ժամանակ:
Բանաստեղծն ուղարկել է փոխանցում կատարածների անունները, որոնցից ոմանք թեեւ օրավարձով աշխատողներ են, սակայն իրենց օրվա աշխատած գումարից բաժին են հանել Արցախում դրա կարիքն ունեցողներին: Գումար ուղարկողները Մոսկվայի «Բերյոզկա» սրճարանի, «Լուսնար» ռեստորանի, «Բոլբոլ ֆուդի» սովորական աշխատակիցներ են:
Սլավի Ավիկ Հարությունյանը համոզված է, որ հենց փոքր գումարների ու կոլեկտիվների ցուցակը կքաջալերի շատերին՝ ուղղորդելով դեպի «Հայաստան» համահայկական հիմնադրամ, որն այս պահին համազգային դրամահավաք է իրականացնում եւ կարեւորում յուրաքանչյուրի ներդրումը:
Կարդացեք նաև
Գոհար ՀԱԿՈԲՅԱՆ
