Հայկական միասնական տեղեկատվական կենտրոնում ՀՀ ՊՆ ներկայացուցիչ Արծրուն Հովհաննիսյանը ասաց, որ Հեյդար Ալիեւը սեփական երկրում ինֆորմացիոն բլոկի տիրույթում է:
«Երեկ եւ այսօր մարտական գործողությունները աչքի ընկան ակտիվ եւ լայնածավալ ապատեղեկատվությամբ, որը տարածում են Ադրբեջանի ռազմաքաղաքական ամենաբարձր ղեկավարությունը, հանրապետության նախագահը, այսինքն, գերագույն գլխավոր հրամանատարը, իր ընտանիքի անդամները, որոնք նաեւ զուգահեռաբար փոխնախագահի պաշտոն ունեն: Եվ այս կապակցությամբ ինչ եմ ուզում ներկայացնել: Մենք տեսանք, թե ինչպես երեկ իրենք իրենց շնորհավորում էին Մատաղիսը գրավելու կապակցությամբ, թվարկում էին մյուս փոքր բնակավայրերը, որոնք Մատաղիսին հարակից են: Իսկ այսօր մենք հրապարակեցինք այն տեսանյութը, որը հստակ ապացուցում է՝ ինչպես են ադրբեջանցի զինծառայողները Մատաղիսի մերձակայքից ուղղակի փախչում հայկական զինված ուժերի հուժկու հրետանային կրակի տակ: Այսօր էլ շարունակվեց նույն տեղեկատությունը՝ կապված Ջաբրայիլի գրավման հետ, ինչը եւս ապատեղեկատվություն է:
Ես 3 հարց ուղղեցի. Եթե Ալիեւը վստահ է, որ Մատաղիսը ազատագրել են, ապա ինչո՞ւ չի այցելում Մատաղիս: Մենք բոլոր հիմնավոր կասկածներն ունենք ենթադրելու, որ Ալիեւը սեփական երկրում ինֆորմացիոն բլոկադայի կամ ապատեղեկատվության տիրույթում է: Փաստացի գերագույն գլխավոր հրամանատարը չի տիրապետում իրավիճակին, այսինքն սխալ են զեկուցում՝ ռազմավարական կառավարման համակարգի խնդիր կա եւ զեկուցում են կեղծ ինֆորմացիա, որը նա փորձում է օգտագործել: Եվ զուգահեռ ոգեւորվում է կեղծ ինֆորմացիայից եւ սեփական բանակի պարտությունը հաղթանակ ներկայացնելու համար փորձում է էժանագին լուրեր տարածել, որոնք շատ հեշտ հերքվում են նույնիսկ տեսանյութերով»:
Աշոտ ՀԱԿՈԲՅԱՆ
