«Բոլոր նրանք, ովքեր կարծում են, թե Ղարաբաղում սովորական պատերազմ է, որը պայմանավորված է չկարգավորված ղարաբաղյան հակամարտությամբ, խորապես սխալվում են: Արցախում (Լեռնային Ղարաբաղում) փորձ է արվում ձեւավորել նոր աշխարհակարգ», – Aravot.am-ի հետ զրույցում ասաց «Հելսինկյան նախաձեռնություն-92» Լեռնային Ղարաբաղի կոմիտեի համակարգող, խաղաղության եւ մարդու իրավունքների միջազգային մրցանակների դափնեկիր Կարեն Օհանջանյանը:
Եվ այս նոր աշխարհակարգում, ըստ փորձագետի, Թուրքիան փորձում է Ադրբեջանի ձեռքով Լեռնային Ղարաբաղում պատերազմի միջոցով փոխել առկա կառուցվածքը եւ վերականգնել իր գերիշխող ազդեցությունը նախկին Օսմանյան կայսրության ողջ տարածքում:
«Լեռնային Ղարաբաղում բախվել են տարածաշրջանային եւ գլոբալ խաղացողների շահերը, ներառյալ Իրանը, Ռուսաստանը, Չինաստանը, ԱՄՆ-ը, Եվրամիությունը: Արցախի ժողովուրդը մեր բնական գործընկերների աջակցությամբ եւ առաջին հերթին` հենվելով սեփական ուժերի վրա, կվերականգնի մարդկային արժեքների հաղթանակը ամբողջ աշխարհում: Առաջադեմ մարդկությունը պետք է կանգնի Արցախի կողքին, որն միայնակ է պաշտպանում մարդկային արժեքներն ողջ աշխարհում»,- ամփոփեց Կարեն Օհանջանյանը:
Նելլի ԳՐԻԳՈՐՅԱՆ
