«Ոչ մի արդարացում ինձ համար ընդունելի չէ, թե ինչու են նրանք լռում, չեն գալիս Արցախ ու արձանագրում այս խնդիրները»,- լրագրողների հետ հանդիպմանը հայտարարեց Արցախի մարդու իրավունքների պաշտպան Արտակ Բեգլարյանը՝ անդրադառնալով ադրբեջանական ագրեսիայի հետ կապված միջազգային իրավապաշտպան հանրության արձագանքին:
Նա փաստեց՝ որոշ հայտարարություններ եղել են, որոշները քիչ թե շատ ողջունելի են, քիչ թե շատ օբյեկտիվ, բայց միևնույն ժամանակ ասաց, որ տեսնում է երկու հիմնախնդիր. «Մեկը՝ լռություն. շատ դեպքերում՝ ներառյալ այս դեպքում, միջազգային հայտնի իրավապաշտպան կազմակերպությունները պարզապես լռում են, այն դեպքում, երբ ավելի փոքր մասշտաբի իրավախախտումներ են արձանագրվում տարբեր պետություններում կամ միջազգային կոնֆլիկտների ժամանակ, և շատ ավելի մեծ աղմուկ են բարձրացնում»:
Արտակ Բեգլարյանի փաստմամբ՝ իրավապաշտպան կազմակերպությունները խնդիր չունեն դիվանագիտական բառապաշարի, արհեստական հավասարության նշան դնելու հարցում. «Իրավապաշտպան կազմակերպությունները պարտավոր են ուղղակի արձանագրել փաստերը օբյեկտիվ կերպով, արձանագրել մեղավորներին: Կարծում եմ՝ այս առումով բացը շատ մեծ է: Ես անձամբ բավարարված չեմ ընդհանուր առմամբ միջազգային իրավապաշտպան համայնքի արձագանքից: Եթե նրանք կարծում են, որ վստահելի աղբյուրների պակաս ունեն, բոլորին հրավիրում եմ Արցախի Հանրապետություն: Թող գան, փաստահավաք գործունեություն իրականացնեն, արձանագրեն և նոր դրանից հետո գնահատական տան»:
Կարդացեք նաև
Տաթև ՀԱՐՈԻԹՅՈՒՆՅԱՆ
