«Մենք ծանոթ ենք հայտարարությանը, սակայն հայտարարության գնահատականը տվելու է մի քիչ ուշ և ոչ իմ մակարդակով»,-մամուլի ասուլիսի ընթացքում հայտարարեց ՀՀ ԱԳՆ մամուլի խոսնակ Աննա Նաղդալյանը՝ չմեկնաբանելով Պուտինի, Թրամփի ու Մակրոնի համատեղ հայտարարությունը:
Այն դիտարկմանը, թե Թուրքիան դեմ է արտահայտվել կրակի դադարեցմանն ուղղված կոչերին, Աննա Նաղդալյանն արձագանքեց. «Այս պահի դրությամբ ունենք միջազգային հանրության վճռական հստակ դիրքորոշում, որ պետք է քայլեր ձեռնարկվեն մարտական գործողությունների դադարեցման ուղղությամբ: Թուրքիայից հնչող հայտարարությունների առիթով՝ ԱԳ նախարարությունն արդեն բազմաթիվ անգամներ հանդես է եկել՝ գնահատելով Թուրքիայի ուղիղ ներգրավվածությունը Արցախի և ՀՀ-ի դեմ սանձազերծված ագրեսիային. ես հղում կանեմ այդ հայտարարությանը: Ինչպես 2016-ի ագրեսիայի ժամանակ, այնպես էլ ներկայումս Ադրբեջանը մարտական գործողությունների համար համապատասխան ֆոն նախապատրաստելու համար դիմում է հստակ քայլերի շարքի, նա հանդես է գալիս ԵԱՀԿ համանախագահության գործողությունների վերաբերյալ քննադատությամբ և հարցականի տակ է դնում համանախագահների գործունեությունը: Այս ամենն ունի մեկ նպատակ՝ աշխարհաքաղաքական առումով ամրապնդել Թուրքիայի դերը Հարավային Կովկաում: Մեր աչքերի առաջ Ադրբեջանը վերածվում է թուրքական պրոքսի երկրի և թուրքական մյուս պրոքսիների հետ քայլեր է ձեռնարկում տարածաշրջանի անվտանգության և խաղաղության խաթարման ուղղությամբ: Որպես միջազգային հանրության պատասխանատու անդամ՝ ՀՀ-ն և Արցախը միասին անելու են ամեն ինչ, որ խաթարեն տարածաշրջանային անվտանգության և կայունության համապարփակության դեմ ցանկացած գործողություն»:
Խոսելով իրանական կողմի արձագանքի և բանակցությունների մասին՝ Աննա Նաղդալյանն ասաց. «Մենք մշտական կապի մեջ ենք Իրանի գործընկերների հետ, այստեղ ասեմ, որ ափսոսանքի արժանի է այն, որ Ադրբեջանը տարածաշրջանի խաղաղությունը վտանգելու համար օգտագործում է այլ երկրի տարածքներ, որպեսզի մարտական գործողություններ և ագրեսիա իրականացնի Արցախի դեմ: Իրանի գործընկերների հետ երկխոսությունը համապարփակ է և ներառում է հարցերի լայն շրջանակ»:
Տաթև ՀԱՐՈՒԹՅՈՒՆՅԱՆ
Կարդացեք նաև
