Ռուսաստանի և Ֆրանսիայի նախագահներ Վլադիմիր Պուտինը և Էմանուել Մակրոնը քննարկել են Լեռնային Ղարաբաղում իրավիճակի սրումը. առաջնորդները կողմերին կոչ են արել առավելագույն զսպվածություն ցուցաբերել և շուտափույթ վերականգնել հրադադարի ռեժիմը: Հեռախոսազրույցը տեղի է ունեցել ֆրանսիական կողմի նախաձեռնությամբ: Այս մասին հայտնում է Կրեմլի մամուլի ծառայությունը:
«Մանրամասն քննարկվել է Լեռնային Ղարաբաղի հակամարտության գոտում իրավիճակի կտրուկ սրումը։ Երկու ղեկավարները լուրջ մտահոգություն են հայտնել շարունակվող լայնածավալ ռազմական գործողությունների կապակցությամբ: Վլադիմիր Պուտինը և Էմանուել Մակրոնը կոչ են անում հակառակ կողմերին շուտափույթ և ամբողջական հրադադար հաստատել, թուլացնել լարվածությունը և առավելագույն զսպվածության դրսևորել», – ասվում է հաղորդագրության մեջ:
Զրույցի ընթացքում նշվել է, որ Լեռնային Ղարաբաղի ճգնաժամի՝ քաղաքական եւ դիվանագիտական մեթոդներով կարգավորումը այլընտրանք չունի: «Այս համատեքստում դիտարկվել են հետագա փոխգործակցության հատուկ պարամետրերը, առաջին հերթին՝ ԵԱՀԿ Մինսկի խմբի ձևաչափով: Մինսկի խմբի համանախագահող երկրների (Ռուսաստան, Ֆրանսիա և ԱՄՆ) ղեկավարների անունից կողմերը կոչ են արել շուտափույթ դադարեցնել բախումները և վերսկսել բանակցային գործընթացը », – տեղեկացնում են Կրեմլից:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
