«Տարածաշրջանում ամենամեծ վտանգավորությունն ունի Թուրքիան, ռուսական՝ այսպես ասած դաշինքն առաջին հերթին վերաբերում է Թուրքիայի սպառնալիքը չեզոքացնելուն»,- Aravot.am-ի հետ զրույցում այսպիսի կարծիք հայտնեց Ռազմինֆո կայքի համակարգող Կարեն Վրթանեսյանը՝ խոսելով ռուսական ռազմաբազայի հիմնական դերակատարության մասին:
Փորձագետի փաստմամբ՝ Թուրքիան, ըստ էության, գրեթե անթաքույց աջակցում է Ադրբեջանին ու շարունակեց. «Դա փաստ է, բայց ես առայժմ չեմ տեսել ՌԴ կողմից որևէ ազդանշան, որ իրենք պատրաստ են Թուրքիային կարգի հրավիրել այս իրավիճակում…Ռուսաստանի բազայի հիմնական դերը Թուրքիայի սպառնալիքը հավասարակշռելն է ու ընդ որում, մենք չպետք է հույսը միայն դնենք այդ բազայի վրա: Այսօր մեր դիվանագետները պետք է աշխատեն, որ ամբողջ աշխարհից խայտառակ ուժեղ ճնշում լինի Թուրքիայի և Ադրբեջանի վրա»:
Հիշեցնենք՝ ռուսական լրատվամիջոցների հետ հանդիպմանը Նիկոլ Փաշինյանը հայտարարել էր. «Ռուսական ռազմաբազան հանդիսանում է Հայաստանի անվտանգության անբաժան մասը։ Լեռնային Ղարաբաղի հակամարտության գոտում լայնածավալ ռազմական գործողությունների այս փուլում «չի ձևավորվել այդ ներուժը կիրառելու անհրաժեշտությունը: Սակայն մեզ մոտ անկանխատեսելի իրավիճակ է, և ոչ ոք հստակորեն չի կարող կանխագուշակել իրադարձությունների հետագա զարգացումը»:
Տաթև ՀԱՐՈՒԹՅՈՒՆՅԱՆ
