«Պաշտպանության մասին» ՀՀ օրենքում փոփոխությունների օրինագծով, որը հեղինակել է կառավարությունը, առաջարկվում է պաշտպանության ոլորտում կառավարության լիազորությունների շարքում ներառել նաեւ հանրապետության տնտեսության զորահավաքային պլանը հաստատելու իրավասությունը:
Օրինագիծն այսօր ներկայացվեց ԱԺ պաշտպանության եւ անվտանգության հարցերի հանձնաժողովի նիստում:
«Ներկայում գործում է նախագահի հաստատած պլանը, իսկ այս օրինագծի ընդունումը հնարավորություն կտա կառավարության որոշմամբ հաստատելու տնտեսության զորահավաքային նոր պլան, ինչն արդի է՝ Ադրբեջանի սանձազերծած ռազմական գործողությունների եւ ՀՀ-ում հաստատված ռազմական դրության պայմաններում: Սրանից բխող միջոցառումների թվում դեր ունի տնտեսության զորահավաքային պլանը»,-հանձնաժողովականներին զեկուցեց պաշտպանության փոխնախարար Գաբրիել Բալայանը՝ շեշտելով, որ կառավարությունն օրինագիծն անհետաձգելի է համարում:
«Հանրապետության տնտեսության զորահավաքային պլանի նախագիծն արդեն մշակված է եւ համաձայնեցված է էկոնոմիկայի նախարարության հետ, եւ օրինագծի ուժի մեջ մտնելուց անմիջապես հետո ներկայացվելու է կառավարության հաստատմանը»,-տեղեկացրեց Գաբրիել Բալայանը:
Կարդացեք նաև
Հավելենք, որ օրինագիծն առաջիկայում պետք է քննարկվի եւ քվեարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
