«Քաղաքացիական պաշտպանության համակարգը բերվել է բարձր աշխատանքային ռեժիմի, բոլոր այն բնակավայրերում, որտեղ խաղաղ բնակչությունը ենթարկվել է հարձակումների, իրականացվել է բնակչության տարհանում կամ պատսպարում. տարհանված եւ պատսպարված բնակչությունը գտնվում է աշխատանքային օպերատիվ խմբի ուշադրության կենտրոնում: Տարհանված մարդիկ պետության հաշվին ապահովվում են անհրաժեշտ պարագաներով՝ սննդով եւ նյութական աջակցությամբ»,- այսօր ասուլիսի ժամանակ ասաց Արցախի պետնախարար Գրիգորի Մարտիրոսյանը:
Ըստ նրա՝ տարհանված բնակիչները տեղավորվել են հիմնականում Արցախի այլ բնակավայրերում, հիմնականում օգտագործվել է հյուրանոցային ֆոնդը:
Գրիգորի Մարտիրոսյանը նաեւ հայտնեց, որ Արցախն ապահովված է անհրաժեշտ բոլոր ապրանքներով, պարենային դեֆիցիտի առաջացման վտանգ այս պահին չունեն. «Ամեն դեպքում, ռազմական գործողությունների մեկնարկը էական վնասներ է հասցրել ընդհանուր տնտեսությանը, այս պահին իրականացնում ենք վնասների գնահատում: Վնասի գույքագրումից բացի անցել ենք վնասի վերականգնման աշխատանքներին, վերականգնել ենք էկելտրաէներգամատակարարումը գազամատակարարման խնդիրների լուծումն ընթացքի մեջ է:
Առավել մեծ վնաս է հասցվել կապի ոլորտին»: Ասուլիսի վերջում պարոն Մարտիրոսյանը խնդրեց, որ Արցախին աջակցությունը ցուցաբերեն ստեղծված օպերատիվ խմբի հետ համաձայնեցված ու խմբի միջոցով՝ կարիքների գնահատման տեսանկյունից ելնելով:
Կարդացեք նաև
Արփինե ՍԻՄՈՆՅԱՆ
