ՀՀ ԱԺ ֆինանսավարկային եւ բյուջետային հարցերի մշտական հանձնաժողովն Արկադի Խաչատրյանի նախագահությամբ սեպտեմբերի 29-ին նիստ է գումարել:
Մինչ օրակարգային հարցերի քննարկմանն անցնելը՝ հանձնաժողովի անդամները մեկ րոպե լռությամբ հարգել են հայրենիքի պաշտպանության համար զոհված մարտիկների հիշատակը:
Արկադի Խաչատրյանը շնորհակալություն է հայտնել հանձնաժողովի նախկին նախագահ Մանե Թանդիլյանին՝ կատարած աշխատանքների համար՝ մաղթելով առողջություն եւ հաջողություններ:
Հանձնաժողովը երկրորդ ընթերցմամբ քննարկել է ՀՀ ԱԺ պատգամավորներ Արտակ Մանուկյանի, Վարազդատ Կարապետյանի, Բաբկեն Թունյանի հեղինակած «Բանկային ավանդների ներգրավման մասին» օրենքում փոփոխություններ եւ լրացում կատարելու մասին» եւ կից ներկայացված օրենքների նախագծերի փաթեթը: Հիմնական զեկուցող Արտակ Մանուկյանը տեղեկացրել է, որ հարցի առնչությամբ տեղի է ունեցել նաեւ աշխատանքային ընդլայնված քննարկում: Նշվել է, որ ոլորտային օրենսդրությունում առկա են անհամապատասխանություններ: Նախագծերի փաթեթի ընդունման անհրաժեշտությունը պայմանավորված է թղթային հաղորդակցումից էլեկտրոնային հաղորդակցմանն անցում կատարելու անհրաժեշտությամբ, միակողմանի հաղորդակցման ձեւի փոփոխման սահմանափակումների իրականացմամբ եւ արտակարգ իրավիճակով պայմանավորված հաղորդակցման կարգավորումների փոփոխմամբ:
Հիմնական զեկուցողին ուղղված հարցերը վերաբերել են բանկային ավանդների ներգրավմանը, սպառողական, հիփոթեքային կրեդիտավորման կանոնակարգումներին:
«Ազգային ժողովի կանոնակարգ» ՀՀ սահմանադրական օրենքի համաձայն՝ օրենքների նախագծերի փաթեթի քվեարկությունը հետաձգվել է:
Հանձնաժողովը քննարկել է ՀՀ հաշվեքննիչ պալատի անդամի թափուր տեղի թեկնածու ընտրելու հարցը:
Հանձնաժողովի նախագահ Արկադի Խաչատրյանը տեղեկացրել է, որ համաձայն «Ազգային ժողովի կանոնակարգ» ՀՀ սահմանադրական օրենքի 145-րդ հոդվածի՝ Հաշվեքննիչ պալատի անդամի թափուր տեղի համար«Իմ քայլը» խմբակցության կողմից ներկայացվել է Կարեն Առուստամյանի թեկնածությունը:
ՀՀ ԱԺ պատգամավոր Արտակ Մանուկյանը, հակիրճ ներկայացնելով թեկնածուի կենսագրությունն ու աշխատանքային գործունեությունը, նշել է, որ թեկնածուն համապատասխանում է առաջադրված չափանիշներին:
Կարեն Առուստամյանը շնորհակալություն է հայտնել «Իմ քայլը» խմբակցությանը՝ Հաշվեքննիչ պալատի անդամի պաշտոնում իր թեկնածությունն առաջադրելու համար: Բանախոսը ներկայացրել է ՀՀ արտաքին պետական հաշվեքննության համակարգի վերաբերյալ իր տեսլականը, անդրադարձել Հաշվեքննիչ պալատի անկախությանը, անկախության պաշտպանությանը, երկրի օրենսդիր մարմնի հետ սերտ համագործակցությանը, ինչպես նաեւ Հաշվեքննիչ պալատի կառավարման արդյունավետության բարձրացմանն ուղղված ծրագրերին:
Ելույթներում հանձնաժողովի անդամները, ընդգծելով թեկնածուի անցած ճանապարհը, նշել են, որ Կարեն Առուստամյանն իր գործունեությամբ կնպաստի Հաշվեքննիչ պալատի ինստիտուտի կայացմանը:
Քվեարկության արդյունքներով հանձնաժողովը ՀՀ Հաշվեքննիչ պալատի անդամի թափուր տեղի համար ՀՀ Ազգային ժողովին է առաջարկել Կարեն Առուստամյանի թեկնածությունը:
ՀՀ ԱԺ Բյուջետային գրասենյակի համակարգող-փորձագետ Գագիկ Բարսեղյանը հանձնաժողովի քննարկմանն է ներկայացրել ՀՀ ԱԺ բյուջետային գրասենյակի հաշվետվությունը 2020 թվականի երկրորդ եռամսյակում կատարված աշխատանքների վերաբերյալ:
Ըստ բանախոսի՝ փորձագետները սահմանված ժամկետներում պատրաստել եւ Ազգային ժողովի ֆինանսավարկային եւ բյուջետային հարցերի մշտական հանձնաժողովին են տրամադրել` ՀՀ 2019 թվականի պետական բյուջեի կատարման մասին տարեկան հաշվետվության, ինչպես նաեւ ՀՀ 2020 թվականի առաջին եռամսյակի պետական բյուջեի կատարման ընթացքի վերաբերյալ Կառավարության ներկայացրած տեղեկանքի ամփոփ նկարագրերը:
Զեկույցն ընդունվել է ի գիտություն:
«Ազգային ժողովի կանոնակարգ» սահմանադրական օրենքի 71-րդ հոդվածի 3-րդ մասի համաձայն՝ մինչեւ երկամսյա ժամկետով հետաձգվել է ՀՀ ԱԺ պատգամավորներ Եղիշե Սողոմոնյանի, Արտակ Մանուկյանի, Տիգրան Ուլիխանյանի, Վարդան Աթաբեկյանի, Համազասպ Դանիելյանի, Երջանիկ Հակոբյանի հեղինակած «Հաշվեքննիչ պալատի մասին» օրենքում փոփոխություններ եւ լրացումներ կատարելու մասին» օրենքի նախագծի քննարկումը:
ՀՀ Ազգային ժողով
