ՄԱԿ Մարդու իրավունքների հարցերով գերագույն հանձնակատար Միշել Բաչելետը մտահոգություն է հայտնել Լեռնային Ղարաբաղում տիրող իրավիճակի կապակցությամբ և կոչ արել անհապաղ դադարեցնել ռազմական գործողությունները:
«Ես մտահոգված եմ Լեռնային Ղարաբաղի հակամարտության գոտում՝ շփման գծի երկայնքով, ռազմական գործողությունների վերսկսմամբ և կոչ եմ անում անհապաղ դադարեցնել ռազմական գործողությունները», – ասված է Բաչելետի հայտարարության մեջ:
Նա նաև մտահոգություն է հայտնել խաղաղ բնակչության շրջանում զոհերի և վիրավորների, քաղաքացիական գույքի և ենթակառուցվածքների վնասների կապակցությամբ։ Բացի այդ, Բաչելետը կոչ է արել բոլոր կողմերին պահպանել մարդասիրական իրավունքը, մասնավորապես, ապահովել քաղաքացիական անձանց պաշտպանությունը:
Պատրաստեց Վիկտորյա ԱՆԴՐԵԱՍՅԱՆԸ
