«Ռուսաստանը դեռ չի օգտագործում իր բոլոր գործիքները եւ միայն հայտարարություններն այս անգամ հաստատ բավարար չեն։ Դա մեծամասամբ կապված է թուրքական գործոնի հետ։ Ըստ էության, Հայաստանը պատերազմում է ոչ միայն Ադրբեջանի հետ, այլ նաեւ ինչ-որ իմաստով Թուրքիայի հետ»,-այս մասին այսօր «Հոդված 3» ակումբում ասաց ռուսաստանաբնակ քաղաքագետ Լեոնիդ Ներսիսյանն՝ անդրադառնալով Արցախում տեղի ունեցող պատերազմական գործողությունների զարգացմանն ու Մոսկվայի եւ միջազգային կառույցների՝ հրադադար հաստատելու ուղղությամբ միջամտություններին ։
Քաղաքագետի կարծիքով՝ Թուրքիայի համար միայն «անհանգստացած ենք» բառը (նկատի ունի միջազգային կառույցների եւ պաշտոնական Մոսկվայի հայտարարությունները, Ն․Բ․) իհարկե բավարար չէ․ «Եվ Ռուսաստանը եթե չի միջամտում հակամարտությանը, ապա առնվազն պետք է ցույց տա, որ ինքը դրան պատրաստվում է։ Այդ ֆոնին նման հայտարարությունները կազդեն։ Օրինակ՝ պետք է ասենք՝ Դաղստանում լայնածավալ զորավարժություններ անցկացնի, պետք է Ռուսաստանը ռազմական ինչ-որ մտադրություններ արտահայտի»։
Բացի այս, ինչպես նշեց քաղաքագետը, պետք է հաշվի առնել, որ ՌԴ-ին հարկավոր է հակամարտությունից առավելագույնս «հեռավորություն» պահպանել՝ իր շահերից դա է բխում․ «ՌԴ-ն կփորձի միանշանակ չկանգնել Ադրբեջանի կամ Հայաստանի կողմը եւ որքան հնարավոր է երկար ժամանակ։ ՌԴ-ն ընտրություն կանի միայն ծայրահեղ դեպքում՝ երբ կողմերից մեկը կսկսի իսկապես պարտվել, եւ այս իրավիճակը կդառնա ավելի վտանգավոր Ռուսաստանի համար, որովհետեւ կկորցնի երկու կողմերին, ՌԴ-ն կկորցնի իր ազդեցությունն ե՛ւ Ադրբեջանում, ե՛ւ Հայաստանում։ Հենց այս պատճառով էլ դրանից օգտվում է Ադրբեջանն ու ծավալում ռազմական գործողություններ՝ հասկանալով, որ ՌԴ-ն պատրաստ չէ ուղղակի միջամտել»։
Կարդացեք նաև
Նելլի ԲԱԲԱՅԱՆ
