Մեծ Բրիտանիայի և Կանադայի արտաքին գործերի նախարարներ Դոմինիկ Ռաաբը և Ֆրանսուա-Ֆիլիպ Շամպայնը Լեռնային Ղարաբաղի հակամարտության կողմերին կոչ են արել անհապաղ դադարեցնել մարտական գործողությունները և վերականգնել բանակցությունները ԵԱՀԿ Մինսկի խմբի շրջանակներում: Երկու երկրների արտաքին գործերի նախարարների համատեղ հայտարարությունը երկուշաբթի երեկոյան հրապարակվել է Մեծ Բրիտանիայի ԱԳՆ կայքում:
«Կանադան և Մեծ Բրիտանիան խորապես մտահոգված են Լեռնային Ղարաբաղի հակամարտության գոտում շփման գծի երկայնքով լայնամասշտաբ ռազմական գործողությունների մասին լուրերից: Բնակավայրերի հրթիռակոծման և քաղաքացիական զոհերի մասին հաղորդագրությունները խիստ մտահոգիչ են: Մենք կոչ ենք անում անհապաղ դադարեցնել ռազմական գործողությունները, պահպանել հրադադարի ռեժիմը և պաշտպանել քաղաքացիական բնակչությանը», – ասված է մամուլի հաղորդագրության մեջ:
Նախարարները նաև շեշտել են, որ Լեռնային Ղարաբաղի հակամարտության ցանկացած լուծում պետք է հիմնված լինի բռնության մերժման սկզբունքի և ԵԱՀԿ Մինսկի խմբի կողմից սահմանված շրջանակներում բանակցությունների միջոցով խաղաղ կարգավորման վրա: «Մենք սատարում ենք ԵԱՀԿ Մինսկի խմբին և լիովին աջակցում ենք համանախագահների հայտարարությանը», – ասված է համատեղ մամուլի հաղորդագրության մեջ։
Պատրաստեց Վիկտորյա ԱՆԴՐԵԱՍՅԱՆԸ
Կարդացեք նաև
