ՌԴ Պետդուման այսօր՝ սեպտեմբերի 29-ին կայանալիք նիստում, կքննարկի Լեռնային Ղարաբաղում իրավիճակի վերաբերյալ հայտարարության նախագիծը, որով կոչ է արվում դադարեցնել ռազմական գործողությունները, ինչպես նաև արվելու է խաղաղ կարգավորման համար միջնորդական օգնության առաջարկ։
Համաձայն Պետդումայի՝ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի պատրաստած հայտարարության նախագծի՝ ՌԴ խորհրդարանի ստորին պալատի պատգամավորները «լուրջ մտահոգություն են հայտնում ղարաբաղյան հակամարտության գոտում իրավիճակի կտրուկ սրման կապակցությամբ, որը հանգեցրել է բազմաթիվ մարդկային զոհերի, և խստորեն դատապարտում են կողմերի կողմից ուժի գործադրումը»։
Պետդուման մտադիր է հայտարարել «անհապաղ հրադադար հաստատելու, տարածաշրջանում առճակատումը կանխելու և իրավիճակի խաղաղ կարգավորմանն այլընտրանք չունենալու անհրաժեշտության մասին»: «Պետդումայի պատգամավորները կողմերին հորդորում են շուտափույթ վերադառնալ բանակցային գործընթացին և պատրաստ են տրամադրել միջնորդական օգնություն իրավիճակի կայունացման համար», – ասվում է հայտարարության տեքստում:
Պատրաստեց Վիկտորյա ԱՆԴՐԵԱՍՅԱՆԸ
