Էստոնիան ՄԱԿ Անվտանգության խորհրդում Լեռնային Ղարաբաղում տիրող իրավիճակի հարցով խորհրդակցություններ է նախաձեռնում: Այս մասին հայտարարել է Էստոնիայի արտաքին գործերի նախարար Ուրմաս Ռեյնսալուն:
Էստոնիան՝ որպես ՄԱԿ Անվտանգության խորհրդի անդամ, նախաձեռնում է խորհրդակցություններ ՄԱԿ-ում Լեռնային Ղարաբաղում տեղի ունեցող իրադարձությունները քննարկելու համար», – հայտնել են Էստոնիայի ԱԳՆ մամուլի ծառայությունից։
«Ես կողմերին կոչ եմ անում անհապաղ դադարեցնել ռազմական գործողությունները և ձեռնարկել բոլոր միջոցները` իրավիճակի հետագա սրումից խուսափելու համար», – շեշտել է ԱԳ նախարարը և հավելել, որ տարաձայնությունները լուծելու համար ուժի կիրառումը դատապարտելի է:
Ռեյնսալուն նաև հայտնել է, որ նախատեսում է կապ հաստատել Հայաստանի և Ադրբեջանի արտգործնախարարների հետ: «Սա ծայրաստիճան լուրջ իրավիճակ է, որը նշանակալի հետևանքներ է ունենում ամբողջ տարածաշրջանի խաղաղության և անվտանգության վրա», – նշել է Էստոնիայի արտգործնախարարը։
Պատրաստեց Վիկտորյա ԱՆԴՐԵԱՍՅԱՆԸ
