«Եթե մի քանի օր էլ շարունակվեն այս ռազմական գործողությունները, Ադրբեջանը խելքի չգա, ապա կարծում եմ, այո, ՀՀ-ն պետք է գնա ճանաչման»,- Aravot.am-ի հետ զրույցում այսպիսի կարծիք հայտնեց քաղաքագետ Արմեն Վարդանյանը՝ անդրադառնալով ՀՀ-ի կողմից Արցախի անկախության ճանաչման անհրաժեշտության հարցին:
Նա հատուկ շեշտեց՝ դա պետք է անել անպայման միջազգային հանրության, միջազգային դերակատարների հետ խորհրդակցելուց հետո. այնպես չլինի, որ ՀՀ-ն ճանաչի, և դա նոր գլխացավանք դառնա Հայաստանի համար:
Հիշեցնենք՝ անդրադառնալով Հայաստանի կողմից Արցախի անկախությունը ճանաչելու կոչերին՝ Արցախի ԱԳ նախարար Մասիս Մայիլյանը հիշեցրեց՝ վարչապետ Նիկոլ Փաշինյանը չի բացառել, որ այդ հարցերը պետք է քննարկվեն և հայտարարեց. «Մենք ասել ենք, որ տավուշյան դեպքերից հետո այդ հարցն արդի է: Այս ամենն անվտանգային համատեքստում պետք է դիտարկել, բայց այս պահին առավել կարեւոր է Արցախի միջազգային ճանաչումը»:
ՀՀ ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն էլ լրագրողների հետ ճեպազրույցում կարծիք էր հայտնել, թե այդ հարցը օրակարգում կա, բայց պետք է սպասել, տեսնել առաջիկա օրերին ռազմի դաշտում ինչ է լինում:
Կարդացեք նաև
Ըստ Արմեն Վարդանյանի՝ ճանաչումը պետք է շատ լավ հաշվարկված քայլ լինի: Նա այս առիթով մանրամասնեց. «Նախկինում Ադրբեջանը բազմիցս հայտարարել է, որ եթե ՀՀ-ն ճանաչի Արցախի Հանրապետությունը, ապա ինքը դուրս կգա ԵԱՀԿ Մինսկի խմբի ձևաչափով տարվող բանակցություններից, և ըստ էության այդ ձևաչափը կփլուզվի: Այս տեսանկյունից Հայաստանը կարծես թե այդ հարցը պահում էր որպես իր վերջին փամփուշտը՝ այսպես պատկերավոր ասած և չէր գնում այդ քայլին: Հիմա, քանի որ իրավիճակ է փոխվել, և այլևս այդ բանակցային ձևաչափն այս պահին միայն ֆորմալ է գործում, Ադրբեջանը փորձում է հարցը լուծել ոչ թե դիվանագիտական ճանապարհով, այլ ռազմական, ապա միգուցե նաև ՀՀ-ն պետք է լրջորեն դիտարկի Արցախի Հանրապետությունը ճանաչելու հարցը: Սակայն ես կարծում եմ՝ սա անելուց առաջ պետք է մեր դիվանագիտությունը, մեր երկրի ղեկավարությունը նաև նախապես հասկանան միջազգային դերակատարների կարծիքը, փորձեն նրանց տրամադրությունները շոշափել և հասկանալ, թե ինչ կհետևի այդ քայլին: Եվ միայն դրանից հետո, այո, միգուցե պետք է ճանաչել Արցախի անկախությունը»:
Արմեն Վարդանյանը փաստեց, մանավանդ, երբ նայում ենք՝ չճանաչված պետությունների դեպքում մշտապես կոնֆլիկտի սրումից հետո են սկսվել ճանաչման գործընթացները ու նշեց. «Օրինակ՝ 2008-ի վրաց-ռուսական պատերազմից հետո Ռուսաստանում սկսվեց Աբխազիան և Հարավային Օսեթիան ճանաչելու գործընթացը ՝որպես պատիժ Վրաստանին կոնֆլիկտը ռազմական ճանապարհով լուծելու փորձի մեջ: Պետք է շատ լավ հաշվարկվեն բոլոր հնարավոր հետևանքները»:
Տաթև ՀԱՐՈՒԹՅՈՒՆՅԱՆ
